САФАРИ О. ОҚИЛОВ БА МАСКАВ

         Душанбе, 11   декабр. (АМИТ «Ховар»,  Наргис  Бояхмедова). – Сарвазири  Ҷумҳурии  Тоҷикистон  Оқил  Оқилов имрӯз  барои  иштирок  дар  маҷлиси  22  — юми Шӯрои  байнидавлатии  Ҷомеаи  иқтисодии  Евразия  ба  шаҳри  Маскав  рафт, ки  пагоҳ,  12  декабр  кушода  мешавад.  Дар  ин маҷлис сарони   Ҳукуматҳои  мамлакатҳои  аъзои  ҷомеа   ширкат  меварзанд. Дар  доираи он   созишномаҳо  дар  бораи  таъсиси   низоми  умумии  таъминоти  иттилоотии  бозори  энергетикии  давлатҳои  аъзои  ҷомеа,  бунёди  низоми  иттилоотии  Ҷомеа   дар  соҳаи   танзими  техникӣ,  тадбирҳои  санитарӣ  ва  фитосанитарӣ,    амалӣ  сохтани  сиёсати  мувофиқашуда  дар  ин  соҳаҳо  ва протоколи   таъсиси  бозори  умумии   суғуртаи  давлатҳои  аъзои  ҷомеа   имзо  карда  мешаванд. Мақоми  олии  иттифоқи  гумрукӣ  дар  масъалаҳои   ташкили  Иттифоқи  гумрукҳо  силсилаи  қарорҳои  муҳим  қабул  хоҳад  кард. Дар  маҷлис  сарони  ҳукуматҳои  Белорусия,  Қазоқистон ва Русия   дар  масъалаҳои  танзими  арзишҳои  таарруфаю  гумрук,  беҳтар  сохтани  идораи  гумрукӣ ва  маълумоти омор,  танзими  техникии тадбирҳои  соҳавӣ 14 қарордоди байналхалқӣ  ва созишномаро дар  бораи котиботи   комиссияи  Иттифоқҳои  гумрукҳо имзо  хоҳанд  кард. Иштирокчиёни  маҷлис  масъалаи  андешидани   тадбирҳои  муштаракро  бо  мақсади  бартараф  сохтани  оқибати  бӯҳрони  ҷаҳонии  молиявӣ  баррасӣ  менамоянд. Дар  ин  маҷлис  сарони  ҳукуматҳои   панҷ  давлати  аъзои  ҷомеа – Белорусия, Қазоқистон, Қирғизистон,  Русия  ва  Тоҷикистон иштирок  менамоянд.