ШУМОРАИ ДОНИШҶӮЁНИ ТОҶИК ДАР МАКТАБҲОИ ОЛИИ ЧИН МЕАФЗОЯД

Душанбе, 10 декабр. АМИТ «Ховар», Наргис Бойахмедова).- Сафири кабири  Тоҷикистон дар Ҷумҳурии Мардумии Чин Рашид Олимов бо  роҳбарони мактабҳои олии  Пекин мулоқот кард, ки дар онҳо донишҷӯёни тоҷик таҳсил мекунанд. Р. Олимов зикр намуд, ки ҳамкорӣ дар соҳаи маориф ҷузъи таркибии   муносибатҳои сол то сол вусъатёфтаистодаи Тоҷикистону Чин мебошад. Қайд карда шуд, ки айни ҳол дар мактабҳои олии Чин бештар аз 60 нафар донишҷӯи тоҷик таҳсил мекунад. Мувофиқи паймони бадастомада, шумораи онҳо  соли 2009 ду баробар зиёд хоҳад шуд. Донишҷӯёни тоҷик солҳои гузашта танҳо бо мақсади омӯзиши забон ба мактабҳои олии Чин дохил мешуданд, акнун онҳо  бо мақсади ба даст овардани ихтисос  дар мактабҳои олии Чин таҳсил мекунанд, гуфт сафир. Иштирокчиёни мулоқот ба саволҳои худ ҷавобҳои мушаххасу қаноатбахш гирифта, марбут ба  вусъат бахшидани ҳамкорӣ дар соҳаи маориф ва тарбияи  кадрҳо барои соҳаҳои гуногуни   иқтисодиёти Тоҷикистон дар мактабҳои олии Чин, ба роҳ мондани ҳамкории мустақими мактабҳои олии ҳар ду мамлакат ва  тавсиаи равобити илмӣ пешниҳодҳо ба миён гузоштанд.