СМЕТАИ ХАРОҶОТИ ФАЪОЛИЯТИ МАҶЛИСИ МИЛЛӢ ТАСДИҚ ШУД

                  Душанбе, 19 декабр.(АМИТ «Ховар», Марзия Саидова).-Дар иҷлосияи 17-уми Маҷлиси миллии Маҷлиси Олии Ҷумҳурии Тоҷикистон, ки 18-уми декабр таҳти раёсати раиси палатаи болоии парлумони мамлакат Маҳмадсаид Убайдуллоев баргузор гардид, беш аз 30 масъалаи муҳими фарогири ҳаёти сиёсию иқтисодӣ ва иҷтимоию фарҳангии мамлакат баррасӣ гардиданд.                 Аъзои Маҷлиси миллӣ Қонунҳои конститутсионии Ҷумҳурии Тоҷикистон «Оид ба ворид намудани тағйиру иловаҳо ба Қонуни конститутсионии Ҷумҳурии Тоҷикистон «Дар бораи мақомоти прокуратураи Ҷумҳурии Тоҷикистон», «Дар бораи судҳои Ҷумҳурии Тоҷикистон», «Дар бораи раъйпурсии Ҷумҳурии Тоҷикистон», «Қонуни Ҷумҳурии Тоҷикистон дар бораи ворид намудани тағйирот ба Кодекси иҷрои ҷазои ҷиноятии Ҷумҳурии Тоҷикистон», Қонуни Ҷумҳурии Тоҷикистон «Дар бораи қабул ва мавриди амал қарор додани Кодекси ҳуқуқвайронкунии маъмурии Ҷумҳурии Тоҷикистон», Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи омори давлатӣ», «Дар бораи сарватҳои зеризаминӣ», «Дар бораи берун баровардан ва дохил кардани сарватҳои фарҳангӣ»-ро мавриди баррасӣ қарор доданд.                Раисони кумитаҳои Маҷлиси миллӣ М. Маҳмудов, М. Холиқов, А. Миралиев, М. Толибов ва М. Илолов масъалаҳои баррасишавандаро шарҳ дода, зикр карданд, ки ҳадаф аз қабули қонунҳои мазкур такмили қонунгузории кишвар, татбиқи ислоҳоти судию ҳуқуқӣ, таҳкими адолати судӣ, таъмини ҳифзи ҳуқуқу озодиҳои шаҳрвандон дар ҷомеа ва рушди иқтисоди миллӣ мебошад.               Ҳамчунин, дар иҷлосия тибқи қарори Маҷлиси миллии Маҷлиси Олии Ҷумҳурии Тоҷикистон сохтор, рӯйхати вазифаҳои Дастгоҳи Маҷлиси миллии Маҷлиси Олии ҷумҳурӣ ва сметаи хароҷот вобаста ба фаъолияти Маҷлиси миллӣ барои соли 2009 тасдиқ гардид. Ин масъаларо роҳбари Дастгоҳи Маҷлиси миллӣ Музаффар Ашӯров шарҳ дода гуфт, ки сохтори палатаи болоии парлумони Тоҷикистон аз 8 шӯъба ва 8 котибот иборат буда, сметаи хароҷоти фаъолияти Маҷлиси миллӣ барои соли 2009 беш аз 4 миллион сомониро ташкил медиҳад.