СОЛИ ҶОРӢ АЗ КИШТИ ТАКРОРӢ 2 ҲАЗОРУ 316 ТОННА ҒАЛЛА БА ДАСТ ОМАД

         Душанбе, 9 декабр. (АМИТ «Ховар»,  Лаззат Диловарзод).- Бино ба гуфтаи президенти Академияи илмҳои кишоварзӣ Ҳукматулло Аҳмадов, зироатҳои дар кишти такрорӣ истифодашаванда онҳое мебошанд, ки давраи нашъунамояшон кӯтоҳ буда, ба гармӣ тобоваранд. Ин зироатҳо то моҳи октябр пӯхта мерасанд ва то 15-уми ноябр онро даравида, кӯфтан мумкин аст. Ба гурӯҳи зироатҳои такрорӣ ҷуворимакка, гандуми навъи «Зафар», ҷави навъи «Ифтихор-86», шолӣ, мош, сояофтобпараст, марҷумак, кунҷид, лӯбиё ва арзан дохил мешаванд. Бояд зикр намуд, ки соли ҷорӣ аз кишти такрорӣ 2 ҳазору 316 тонна ғалла, 24 ҳазору 226 тонна сабзавот, 5 ҳазору 275 тонна полезӣ ба даст омадааст.