СОЗМОНҲОИ ҶАМЪИЯТӢ ҲУҚУҚИ ЗАНОНРО ҲИМОЯ МЕКУНАНД

          Душанбе, 10 декабр. АМИТ «Ховар», Мавлуда Юнусова).- 20 нафар намояндаи созмонҳои гуногуни ҷамъиятии  шаҳрҳои Душанбе ва Қӯрғонтеппа мувофиқи барномаи Созмони ҷамъиятии  «Маркази маърифати  гендерӣ» роҳу усулҳои  ҳимояи ҳуқуқи  занонро  ба моликият зимни  мурофиаҳои судӣ  омӯхтанд. Роҳбари маркази мазкур София Қосимова зимни сӯҳбат бо мухбири АМИТ  «Ховар» дар бораи ҳадафу вазифаҳои барнома сухан ронда, изҳор намуд, ки мақсади асосии он  ҳимояи ҳуқуқи занон ба моликият бо роҳи  таъсиси хадамоти воҳиди  иттилоотию машваратӣ  дар мавриди баррасии  парвандаҳои марбут ба масъалаҳои  никоҳ ва оила  дар судҳо мебошад. Мувофиқи барнома, намояндагони созмонҳои ҷамъиятӣ бояд ба занон кӯмаки ройгони  иттилоотию ҳуқуқӣ расонанд. Чунин кӯмак дар  марказҳои   хуқуқи занони  шаҳрҳои Душанбею Қӯрғонтеппа ва ноҳияҳои Вахшу Бохтар, Ваҳдату Варзоб ва Рӯдакӣ расонда мешаванд. Кормандони созмонҳои ҷамъиятӣ ва ёрдамчиёни онҳо роҳу усулҳои  расондани кӯмаки ҳуқуқӣ ба занонро дар ҷараёни машғулиятҳо ва машқҳои таълимӣ омӯхтанд.