ТАҶЛИЛИ РӮЗИ ЭНЕРГЕТИКҲО

                 Душанбе, 22 декабр.( АМИТ «Ховар», Людимла Дубинина).- Энергетикҳои тоҷик иди касбии худро бо дастовардҳои арзанда таҷлил менамоянд. Сардори раёсати электроэнергияи Вазорати энергетика ва саноати ҷумҳурӣ Абдулло Қурбонов ба АМИТ «Ховар» хабар дод, ки имрӯз ба шарафи иди касбии энергетикҳо дар деҳаи Харангони ноҳияи Варзоб нерӯгоҳи хурди барқӣ ба кор дароварда мешавад. Иқтидори он 80 киловатт/ соат мебошад. Нерӯгоҳи мазкур деҳаи Харангон ва маҳалҳои маскунии атрофи онро бо қувваи барқ таъмин хоҳад кард.               То охири сол дар мамлакат боз се нерӯгоҳи хурди барқӣ дар деҳаҳои Лангари ноҳияи Мастчоҳ, Сурхтеппаи ноҳияи Ҷалолиддини Румӣ ва Такоби ноҳияи Варзоб ба кор дароварда хоҳад шуд, гуфт Абдулло Қурбонов.