ТАҶЛИЛИ РӮЗИ ЁРДАМЧИЁНИ ИХТИЁРИИ ҶАМЪИЯТИ ҲИЛОЛИ АҲМАР

Душанбе 5 декабр. (АМИТ «Ховар», Фарангис Раҳимова).- Имрӯз дар саросари мамлакат Рӯзи ҷаҳонии ёрдамчиёни ихтиёрии  ҷамъиятҳои  Салиби Сурх ва Ҳилоли Аҳмар таҷлил карда мешаванд. Ба ин муносибат дар шаҳри Душанбе ва  шаҳру ноҳияҳои  мамлакат  ҷамъомадҳои идона баргузор мегарданд. Директори генералии Ҷамъияти  Ҳилоли Аҳмари Тоҷикистон Зафар Муҳаббатов ба мухбири АМИТ «Ховар» гуфт, ки  ёрдамчиёни ихтиёрӣ дар пешрафти фаъолияти ҷамъият нақши муҳим мегузоранд. Қариб тамоми масъалаҳои фаъолияти ҷамъият ба  иштироки  ёрдамчиёни ихтиёрӣ вобаста мебошад. Ба қавли  ҳамоҳангсози барномаи кор бо ҷавонон ва  ихтиёриёни ҷамъият  Улуғбек Салимбекзода  имрӯз  Ҷамъияти Ҳилоли Аҳмари Тоҷикистон бештар аз 8 ҳазор нафар ёрдамчиёни ихтиёрӣ дорад. Онҳо дар  иҷрои тамоми барномаҳои  ҷамъият ширкат меварзанд. Ихтиёриён аз ҷумла барои бартараф сохтани оқибати  фалокатҳои табиӣ, ташвиқу тарғиби ҳуқуқи байналмилалии гуманитарӣ, расонидани кӯмак ба маъюбону  пиронсолон ва ғайра истифода бурда мешаванд. Умуман  ҷунбиши байналмилалии Салиби Сурх ва Ҳилоли Аҳмар мувофиқи принсипҳои ихтиёрӣ ба роҳ монда шудааст.