ТАЙЁРИИ ҲУНАРПЕШАГОН БА ИДИ СОЛИ НАВ

        Душанбе,  12  декабр.(АМИТ «Ховар», Таҳмина  Ғоибназарова). –  Имрӯзҳо  тамоми  театрҳои  мамлакат   ба  истиқболи  Иди Соли  нав  барномаҳои   ҷолиби  диққат  таҳия  месозанд. Аксарияти   ин  барномаҳо  барои  тамошобинони  хурдсол  пешбинӣ  шудаанд. Вале  дар  Театри  давлатии  ҷавонони  ба  номи  Маҳмудҷон  Воҳидов  барои   калонсолон  барномаи  идонаи  «Шаби  ҳаҷв»  тайёр  карда   мешавад. Барномаи  мазкур  8 саҳначаи ҳаҷвиро  бахшида ба  воқеаҳои  муқаррарии  марбут  ба  ҳаёти  коргарони муҳоҷирони тоҷик  дар  мамлакатҳои  дигар,  муносибати келину  хушдоман,  ҳамкорон ва    ғайраро дар  бар  мегирад. Муаллиф  ва  коргардони   барнома  Шодӣ  Солеҳов  зимни  сӯҳбат  бо  мухбири  АМИТ «Ховар»  изҳор  намуд, ки  бо  намоиши саҳначаҳои  мазкур  ҳусну  қубҳи  рафтору  ақлоқи  одамонро   танқиду  масхара   карданӣ  нест. Мо  воқеаҳои  гуногуни  ҳаёти  одамонро  пешкаши  тамошобинон  мегардонем. Бигзор  онҳо  дар  бораи  ҳусну  қубҳи  рӯзгори  худ  хулосаи  зарурӣ  бароранд, гуфт  Ш. Солеҳов. Ҳунарпешагони театр  тамошобинони  хурдсолро  низ  фаромӯш  накардаанд.  Рӯзҳои  Иди  Соли  нав  барои онҳо  асари  саҳнавии  «Харгӯшаки мағрур»  намоиш  дода  мешавад.