ТАЛАБАГОНИ ТОҶИК – ҒОЛИБОНИ ОЛИМПИАДАИ ҒОИБОНАИ ИНТЕРНЕТӢ

        Душанбе, 10   декабр. (АМИТ «Ховар», Людмила  Дубинина). –  Талабагони  Гимназия – интернати муштараки  Тоҷикистону  Русия  Хусрав  Ёров  ва  Шоҳин  Саъдуллоев  аз  ҷумлаи  20  нафар  иштирокчиёни  беҳтарини  олимпиадаи  ғоибонаи  интернетии  математикҳои ҷавон  гардида,  сазовори  диплом  дониста  шуданд. Олимпиадаи  мазкур  аз 15  июл  то  15  сентябри соли равон баргузор  гардид ва  дар  он бештар аз 500 нафар  талабагону  донишҷӯён  ва одамони   касбу  кори  гуногун  ширкат  варзиданд. Онҳо  мисолу  масъалаҳои  мураккабтарини  математикиро  ҳал  намуда,  ба  ҳайати  доварон  пешниҳод  карданд.  Доварон  вазифаҳои  иҷрошударо  дар  давоми  2  моҳ  тафтиш  карда,  ғолибонро  муайян  карданд. Ташкилкунандагони  олимпиада —  Бунёди  «Династия» ва  Маркази  омӯзиши  муттасили  математикаи   Маскав  мебошанд. Ҳайати  доварон ба  мисолу  масъалаҳои  ҳал  намудаи   талабагони тоҷик  низ  баҳои  баланд  дод. Муаллими  математикаи  гимназия – интернат  Абдувалӣ  Давлатов  ба  мухбири  АМИТ «Ховар»  гуфт, ки  ба  ғолибони олимпиада  баробари  дипломҳо  чанд  нусха  китоби  математика  низ  тӯҳфа  карда  шуд. Акнун  чунин  олимпиадаҳои  ғоибона  на танҳо  аз  фанни   математика, балки  аз  фанҳои  физика  ва химия  низ  ҳар  сол  гузаронида  мешаванд. Талабагони  гимназияи  мо ба  олимпиадаҳои оянда  ҳамаҷониба тайёрӣ  мебинанд, гуфт А. Давлатов.