«ТОҶИКАГРОЛИЗИНГ» БА ДЕҲҚОНОНИ ВИЛОЯТИ ХАТЛОН КӮМАК МЕРАСОНАД

             Қӯрғонтеппа, 2  декабр. АМИТ «Ховар»,  Мурод  Сотиев). – Соҳаи  кишоварзии  вилояти  Хатлон имрӯз   ба  4  ҳазор  трактор барои анҷом  додани  кори  байни  қаторҳо, 3  ҳазор  трактори  шудгоркунанда,  185 комбайни ғалладарав  ва теъдоди  зиёди  навъҳои  дигари техника   ниёзманд  аст. Хоҷагиҳои   деҳқонии  вилоят  имкон  доранд, ки   тамоми  техникаи  заруриро  ба  воситаи  Корхонаи  воҳиди  давлатии «Тоҷикагролизинг»  дастрас  намоянд.  Онҳо  бояд  барои ин  ариза  пешниҳод  кунанд. Мутахассисони  корхона  баъди  баррасии  аризаҳо  дар  бораи  додани техника  ба  хоҷагиҳои  кишоварзӣ  қарор  қабул  мекунанд. Хоҷагиҳои  деҳқонӣ  дар  ин  маврид бояд 30  фоизи  арзиши  техникаро  пешакӣ  супоранд. Қисми  боқимондаи  арзиши он  дар  давоми  се  сол  пардохта  мешавад. Баъдан  хоҷагиҳо  дар  бораи  хариди  техника  бо корхонаи  мазкур  қарордод  имзо  мекунанд. Ба  ақидаи  мутахассисон,  чунин  усули кор ҷараёни  хариди  техникаро  хеле  осонтар  мегардонад.