ТОҶИКИСТОН ҲУҚУҚУ ОЗОДИҲОИ ИНСОНРО МУҚАДДАС МЕДОНАД

        Душанбе, 26 декабр. (АМИТ «Ховар», Марзия Саидова).- Ҷумҳурии Тоҷикистон ҳамчун ҷузъи ҷудонашавандаи ҷомеаи башарӣ ҳуқуқу озодиҳои инсонро муқаддас шуморида, чун арзиши олӣ ба он арҷ мегузорад,- гуфт муовини раиси Маҷлиси намояндагон Шуҷоат Ҳасанова дар ҳамоише, ки таҳти унвони «Татбиқи стандартҳои байналмилалӣ ва миллӣ оид ба ҳуқуқи башар ва ҳимояи гурезагон дар Ҷумҳурии Тоҷикистон» баргузор шуд. Ин чорабинӣ бахшида ба 60-умин солгарди қабули Эъломияи умумии ҳуқуқи башар бо ибтикори Маҷлиси намояндагони Маҷлиси Олии ҷумҳурӣ, Раёсати Комиссариати Олии Созмони Милали Муттаҳид оид ба гурезагон ва Созмони ҷамъиятии «Ҷамъият ва ҳуқуқ» доир гардид.       Дар ҳамоиш зикр шуд, ки парлумони Тоҷикистон ҷиҳати ҳифзи ҳуқуқу озодиҳои инсон як қатор санадҳои ҳуқуқиро қабул намудааст. Кодексҳои  гражданӣ, меҳнат, оила ва ҷиноии Ҷумҳурии Тоҷикистон ва Қонунҳои Ҷумҳурии Тоҷикистон «Дар бораи гурезагон», «Дар бораи вазъи ҳуқуқии шаҳрвандони хориҷӣ», «Дар бораи муҳоҷират», «Дар бораи шаҳрвандӣ», «Дар бораи сарҳади давлатӣ» дар таъмини ҳукуқу озидиҳои инсон, бахусус гурезагон нақши муассир мегузорад.        Тибқи иттилои Хадамоти муҳоҷирати Вазорати корҳои дохилии ҷумҳурӣ, феълан дар Ҷумҳурии Тоҷикистон беш аз 1700 гуреза, ки аслан шаҳрвандони Ҷумҳурии Исломии Афғонистон мебошанд, ба қайд гирифта шудаанд.