«ТОҶИКНИҲОЛПАРВАР» НОКУ ТОКУ ТУТ ПАРВАРИШ МЕКУНАД

Душанбе, 2 декабр. (АМИТ «Ховар», Фарангис Раҳимова). — Аз соли 1973 ин ҷониб дар назди Вазорати кишоварзии Ҷумҳурии Тоҷикистон Корхонаи воҳиди ҷумҳуриявии хоҷагиҳои ниҳолпарвари «Тоҷикниҳолпарвар» бо тарзи худмаблағгузорӣ самаранок фаъолият намуда истодааст. Айни замон дар 13 ноҳияи ҷумҳурӣ  13 адад хоҷагии махсуси ниҳолпарварӣ мавҷуд буда, навъҳои беҳтарини ниҳолҳои мевадиҳанда, сояафкан ва ороиширо парвариш менамоянд. Аз маркази матбуот ва иттиллоотии  Вазорати кишоварзӣ ба мухбири АМИТ «Ховар» хабар доданд, ки  корхонаҳои ниҳолпарвар ҳар сол зиёда аз 1,5-1,7 миллион бех ниҳоли себ, нок, ток, тут, субтропикӣ, ҳамешасабз, сояафкан, гулбуттаҳоро  парвариш намуда, пешкаши харидорон мегардонанд. Имсол барои шинонидан дар мавсими тирамоҳи соли 2008 ва баҳори соли 2009 ба миқдори 745,2 ҳазор бех ниҳоли гуногун парвариш  ёфта истодааст. Аз  ҷумла, 449 ҳазор бех  ниҳоли мевадиҳанда, 136,2 ҳазор бех навъҳои беҳтарини ниҳоли ток, 59,2 ҳазор бех ниҳоли тут, 100,2 ҳазор бех ниҳоли ороишиву сояафкан барои бунёди боғу токзорҳо тайёр аст. Ниҳолҳое, ки дар  хоҷагиҳои махсуси ниҳолпарварӣ парвариш меёбанд, ба стандартҳои давлатӣ ва барои шинондан дар минтақаҳои гуногуни ҷумҳурӣ  мувофиқанд.