«ТОҶИКСТАНДАРТ» ДАР КӮЛОБ ФАЪОЛИЯТАШРО ПУРЗӮР МЕНАМОЯД

         Душанбе, 2 декабр. (АМИТ «Ховар», Бекназари Абӯбакр).- Дар давоми 11 моҳи соли ҷорӣ раёсати минтақавии Агентии давлатии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон дар минтақаи Кӯлоб 600 ташхис ва санҷиши маводи ғизоию маҳсулоти кишоварзӣ гузаронд. Дар 38 ҳолат ҷавобгӯ набудани маҳсулот ба меъёрҳои қабулшуда ошкор гардид. Аз маркази матбуоти Агентии давлатии «Тоҷикстандарт» ба мухбири АМИТ «Ховар» хабар доданд, ки аз оғози сол то ин ҷониб дар минтақаи Кӯлоб фурӯши беш аз 21 тоннаву 487 килограмм орди барои истеъмол номувофиқ манъ карда шуд. Инчунин, дар нуқтаҳои савдои минтақа фурӯши 895 килограмм равғани пахта, 300 килограмм шакари худсохт, 270 килограмм маҳсулоти қаннодӣ, 100 килограмм маҳсулоти ширӣ, 260 килограмм макарон, 90 килограмм ҳасиб, 70 килограмм чой ва беш аз 200 декалитр машрубот ва нӯшокиҳои пастсифат манъ карда шуд. Бояд зикр намуд, ки Агентии «Тоҷикстандарт» минбаъд ба фаъолияти озмоишгоҳҳо бештар таваҷҷӯҳ дода, маҳз дар ин ҷо Қонун «Дар бораи ҳифзи ҳуқуқи истеъмокунандагон»-ро татбиқ менамояд.