ВАЗОРАТИ ФАРҲАНГИ ҶТ: «МО ИН САФАРРО ДЕР БОЗ ИНТИЗОР БУДЕМ! »

                Душанбе, 5 декабр. (АМИТ «Ховар», Лутфия Эшонқулова).- Аз 9-ум то 13-уми декабр дар Ҷумҳурии Исломии Эрон бо ташаббуси Сафоратхонаи Тоҷикистон дар Эрон Рӯзҳои дӯстиву фарҳангии Тоҷикистону Эрон баргузор мегардад. Тавре ба АМИТ «Ховар» аз Вазорати фарҳанги ҶТ хабар доданд, онҳо дер боз тасдиқи барномаро аз Эрон интизор буданд. -«Мо аллакай 10 рӯз пеш рӯйхати иштирокчиёнро тартиб дода, барномаро тарҳрезӣ намудем, аммо даъвати расмиро як соат пеш гирифтем»- гуфтанд аз вазорат.                Барномаи рӯзҳои дӯстиву фарҳангӣ анъанавӣ буда, 4 барномаи консертии классикӣ ва муосир, намоиши рассомон ва суратгирони касбиро дар бар мегирад. Ҳамчунин дар доираи ин рӯзҳо намоиши либосҳои таърихӣ ва муосири тарроҳ М.Қаюмова намоиш дода мешавад. Шабҳои эҷодии шоирони халқӣ Гулназар Келдӣ ва Ҳақназар Ғоиб низ доир хоҳад шуд.