ВАЗОРАТИ КИШОВАРЗИИ ТОҶИКИСТОН БУЗИ СЕРПАШМ МЕФУРӮШАД

         Душанбе, 16 декабр. (АМИТ «Ховар», Лаззат Диловарзод).- Бо Қарори Ҳукумати ҷумҳурӣ аз 1-уми октябри соли 2007 «Барномаи рушди соҳаи зотпарварӣ ва хушзоткунии чорво» тасдиқ гардидааст. Дар асоси барномаи мазкур, Вазорати кишоварзӣ барои беҳтар намудани зоти чорво ба хоҷагиҳои зотпарварӣ супориш додааст, ки дар соли ҷорӣ 900 сар чорвои калони шохдор, 4 ҳазору 800 сар гӯсфанд, 400 сар бузи тоҷикии серпашм ва 60 сар аспи зотиро ба дигар хоҷагиҳо ба фурӯш бароранд. То имрӯз дар миқёси ҷумҳурӣ 49 адад завод, хоҷагӣ ва фермаҳои зотпарварӣ фаъолият доранд. Фаъолияти хуби ин миқдор хоҷагиҳои зотпарварии ҷумҳурӣ имкон медиҳад, ки барномаи мазкур сари вақт амалӣ карда шавад.