ВАЗОРАТИ МОЛИЯ МЕЪЁРҲОИ БАЙНАЛХАЛҚИИ ҲИСОБОТИ МОЛИЯВИРО ИСТИФОДА МЕБАРАД

           Душанбе,  31  декабр. (АМИТ «Ховар»,  Покиза  Маҳмадбекова). –  Дар  вазорати  молияи  ҷумҳурӣ  ба  муносибати  анҷом  ёфтани   таҳияи  тавсияҳои  методӣ барои  истифодаи меъёрҳои  байналхалқии ҳисоботи  молиявӣ маҷлиси шӯрои  методологӣ  баргузор  гардид. Дар он муовини вазири  молия  Ҷамолиддин  Нуралиев  ҳисобот  дод. Вай қайд кард, ки меъёрҳои  байналхалқии  ҳисоботи  молиявӣ  дар  заминаи  вазифаҳои   ба миён гузоштаи  Сарвари  давлат  ва  Ҳукумати  Тоҷикистон истифода  карда  мешаванд.           Таҳияи тавсияҳои  методӣ дар бобати  истифодаи меъёрҳои  байналхалқии  ҳисоботи  молиявӣ   ба  кор  ҷалб  намудани  мутахассисони   варзидаи  соҳаро  талаб  мекард.  Дар  ҷараёни  баррасии масъалаҳои истифодаи  меъёрҳои  мазкур   проблемаҳои  гуногун  ба  миён  омаданд. Барои  бартараф  сохтани онҳо  мутахассисони  таҷрибаноки  соҳаҳои андоз,  омор, муқаррар  намудани  арзиши  мол  ва  муомилоти  пул  ҷалб  карда  шуданд.  Дар  ин  тадбир  инчунин  намояндагони  созмонҳои  байналхалқии  молиявӣ  саҳм   гузоштанд.       Намояндагиҳои Бонки тармиму таҷдид ва рушди  Аврупо  ва Департаменти  байналхалқии   рушди   соҳаи  молиявии   Британияи  Кабир  дар  Тоҷикистон  барои таҳлили  шароити  истифодаи   меъёрҳои  байналхалқии  ҳисоботи  молиявӣ дар соли  2008    мушовири  махсусро таъин  намуданд. Ӯ  дар  бораи  ворид  сохтани  тағйироту  иловаҳо  ба  қонунҳои  мавҷуда  тавсияҳо  пешниҳод  намуд.  Дар  давоми  солҳои  2009 – 2010  намояндагони  созмонҳои  байналхалқӣ  ба   амалӣ  сохтани  ислоҳот  ҷалб  намуда,   дар  ин  масъала  бо   вазорату  идораҳои  дахлдори  ҷумҳурӣ  ҳамкорӣ  карда  мешавад,  гуфт  дар  хотима  Ҷамолиддин  Нуралиев.