ЗАНОНИ МО ДАР ВАЗИФАҲОИ РОҲБАРӢ КОР КАРДА МЕТАВОНАНД?

Душанбе, 24 декабр. (АМИТ «Ховар», Жасмин Назарова).- 25 – 26-уми декабр дар Мақомоти иҷроияи маҳаллии ҳокимияти давлатии ноҳияи Исмоилӣ Сомонӣ таҳти унвони «Зан — роҳбар» семинар гузаронида мешавад. Тавре ба хабарнигори АМИТ «Ховар» мудири шӯъбаи кор бо зан ва оилаи дастгоҳи раиси ноҳияи И. Сомонӣ Файзигул Юсупова иттилоъ дод, мақсади гузаронидани семинари мазкур тайёр намудан ва ҷобаҷогузории кадрҳои лаёқатманд, фароҳам сохтани шароити иҷтимоию иқтисодӣ, таъмини ҳуқуқ ва кафолати иштироки баробарии занон дар ҳалли масъалаҳо, иштироки бевоситаи онҳо дар идоракунии давлат аст.  — Оё занони мо барои дар вазифаҳои роҳбарӣ кор кардан омода ҳастанд? Дар ин замина, заноне, ки дорои истеъдоду малакаанд, яъне ҳунари суханварию қобилияти ташкилотчигӣ доранд, бояд ба зинаи роҳбарӣ ҷалб карда шаванд,- гуфт ӯ.Бояд зикр намуд, ки дар семинар муовини раиси ноҳияи И. Сомонӣ З. Зокирова, мудирони шӯъбаҳои Кумитаи кор бо зан ва оилаи назди Ҳукумати ҶТ У. Норов ва М. Шокирова, мудири шӯъбаи молияи ноҳияи И. Сомонӣ Д. Кенҷаев бо маърӯзаҳои «Санъати суханварӣ», «Технологияи иттиллоотию компютерӣ», «Стратегияи ислоҳоти идоракунии давлатӣ дар ҶТ», «Моҳияти идоракунии давлатӣ. Асосҳои ҳуқуқии он» ва «Ҷараёни иҷроиши барномаҳои давлатӣ оид ба сиёсати гендерӣ» баромад мекунанд.