ҚАТАР ДАР ДУШАНБЕ МАСҶИД ВА МАҶМААИ БИНОҲОИ ТИҶОРАТИ МЕСОЗАД

          Душанбе, 19 январ.(АМИТ «Ховар», Марзия Саидова).-Масъалаҳои татбиқи барномаҳои инвеститсионии давлати Қатар дар шаҳри Душанбе зимни мулоқоти Раиси шаҳри Душанбе Маҳмадсаид Убайдллоев бо Вазири давлатӣ оид ба ҳамкориҳои байналмилалии давлати Қатар Холид ибни Муҳаммад ал-Атия баррасӣ шуданд.        Ҷонибҳо доир ба сохтмони масҷиди мўҳташами ба номи Ал-Бухорӣ,  маҷмўи иншооти бисёрошёнаи манзилӣ, ки дар асоси  тафоҳумоти ҳасанаи байни Сарони ҳар ду кишварҳо амалӣ хоҳанд гардид,  табодули назар карданд.          М. Убайдуллоев гуфт, ки баҳри таҳкими робитаҳои оғозгардида дар асоси муроҷиати бахши душанбегии ширкати «Ад-Диёр»-и давлати Қатар ба ширкати мазкур барои лоиҳакашии маҷмааи биноҳои  савдою манзилӣ дар кўчаи Низомии Ганҷавии Душанбе аз ҷониби шаҳрдорӣ иҷозат дода шуда, барои иҷрои ин амал ба он ду сол мўҳлат муқаррар карда шудааст.           Зимнан раиси шаҳр бо истифода аз ҳузури вазир даъват ба миён овард, ки бо таҳияву аз экспертизаи давлатии меъморӣ ва сохтмони гузаронидани лоиҳаи мазкур барои дар доираи талаботи қонунгузории мамлакат ҳар чи зудтар оғоз бахшидан ба бунёди иншоот ҷиҳати дастрас намудани Қарори дахлдори Раиси шаҳр  оид ба иҷозати сохтмон корҳо ҷоннок карда шаванд.          Тибқи иттилои котиби матбуотии раиси шаҳри Душанбе Шавкат Саидов, дар ҷараёни мулоқот мусоҳибон масоили марбут ба интихоби қитъаи замин барои дигар лоиҳаҳои аз ҷониби давлати Қатар дар шаҳри Душанбе татбиқшавандаро мавриди муҳокима қарор доданд.          Зикр гардид, ки шаҳрдори Душанбе барои ҳамкориҳои мутақобилан судманд бо ширкатҳои давлати Қатар омодааст. Дар фарҷоми мулоқот баҳри расидагӣ ба ин ҳадафҳо ва омўзиши амиқи масъалаву мутобиқгардонии онҳо ба талаботи қонунгузории кишвар аз ҳар ду ҷониб гурўҳи муштараки корӣ таъсис дода шуд.