ҲАҶМИ МАБЛАҒҲОИ ИНТИҚОЛИИ БРТ БА 48,6 МИЛЛИОН ДОЛЛАРИ ИМА РАСИД

               Душанбе, 29 январ. (АМИТ «Ховар», Покиза Маҳмадбекова). — Соли сипаришуда ҶСП «Бонки рушди Тоҷикистон» тавонист мавқеи худро дар бозори молиявии Тоҷикистон қавитар гардонад.                Тавре ба мухбири АМИТ «Ховар» аз бонки мазкур иттилоъ доданд, дороиҳои бонк ба санаи 31 декабри соли 2008 — ум 98 миллиону 614 ҳазору 398 сомониро ташкил дод, ки афзоиш он нисбати соли 2007 — ум 210,1 фоиз зиёд мебошад. Дороиҳои худи бонк (сармоя) дар охири сол 60 миллиону 482 ҳазору 643 сомониро ташкил дод, ки ба 243,2 фоиз нисбат ба ҳамин давраи соли гузашта зиёд мебошанд. Ӯҳдадориҳои бонк бошанд, дар ин давра ба 38 миллиону 131 ҳазору 755 сомонӣ расиданд, ки ин нишондиҳанда 69,04 фоиз нисбати соли гузашта зиёд аст.               Даромад дар соли ҳисоботӣ 14 миллиону 394 ҳазору 435 сомониро ташкил дод ва ҳамин тарз нисбати соли гузашта 170,2 фоиз зиёд мебошад. Қарзҳои додашуда дар соли 2008 нисбат ба соли гузашта 85,7 фоиз зиёд гашта, 98 миллиону 506 ҳазору 511 сомониро ташкил доданд. Яке аз самтҳои асосии қарздиҳӣ ин маблағгузории рушди соҳаи кишоварзӣ мебошад. Дар соли 2008 вазни қиёсии қарзҳои хоҷагии қишлоқ 16,4 фоизи ҳаҷми умумии қарзҳои додашуда ё 16 миллиону 150 ҳазору 930 сомониро ташкил дод.               Ҳамчунин қайд гардид, ки амонатҳои шахсони воқеӣ ва ҳуқуқӣ ба 26 013 596 сомонӣ расиданд, ки ин 298 фоиз нисбати аввали сол зиёд мебошад. Ҳаҷми маблағҳои интиқолӣ бошад, ба санаи якуми январи соли 2009 -ум ба 48,6 миллион доллари ИМА баробар гардид.