ҶАМЪБАСТИ НАТИҶАҲОИ ФАЪОЛИЯТИ ҲАРАКАТИ ОЛИМПӢ

               Душанбе, 22 январ. (АМИТ «Ховар», Пайрав Назаров). — Дар ноҳияи Варзоб натиҷаҳои иҷрои ду барномаи Ҳаракати олимпӣ дар шаҳру ноҳияҳои озмоишии ҷумҳурӣ ҷамъбаст карда шуд. Аз дафтари матбуоти Академияи миллии олимпӣ ба АМИТ «Ховар» хабар доданд, ки дар муҳокимаи масъалаи мазкур муовини раиси Академияи миллии олимпӣ, роҳбари барномаи «Ҳаракат ва маърифати олимпӣ» И.Шарифӣ, сардори раёсати рушди тарбияи ҷисмонӣ ва варзиши Кумитаи кор бо ҷавонон, варзиш ва сайёҳии назди Ҳукумати ҷумҳурӣ, роҳбари барномаи «Зан ва варзиш» Н.Набиева ва дигарон ширкат варзиданд. Намояндагони созмонҳои мутасаддӣ дар бораи фаъолияташон ҳисобот доданд.               Дар ҷараёни мулоқот ба натиҷаҳои хуби ҳаракати олимпӣ дар ноҳияҳои Ҳисор, Рӯдакӣ ва Нуробод баҳои хуб дода, натиҷаҳои ғайриқаноатбахши он дар ноҳияҳои Ваҳдату Кӯлоб ва шаҳри Қӯрғонтеппа ҳадафи танқид қарор дода шуданд.