АҲОЛИИ ДУШАНБЕ БО ОБИ ТОЗА ТАЪМИН КАРДА МЕШАВАД

          Душанбе,  5  январ. (АМИТ «Ховар»,    Людмила  Дубинина). –  Роҳбари дафтари матбуоти Корхонаи воҳиди давлатии «Душанбеводоканал»  Акобир  Ашӯров  ба  мухбири  АМИТ «Ховар»  хабар  дод, ки  Сарҳавзи танзими  оби шаҳри  Душанбе  дар  давоми  фаслҳои тобистону  тирамоҳи  соли  2008  пурра  тармим  карда шуд. Дар  доираи  тадбирҳои  андешидашуда,  ҳаҷми  ғунҷоиши  сарҳавз  дар  давоми  шабонарӯз  ба  270  ҳазор  метри мукааб  расонда,  тамоми  асбобу  анҷом  ва  таҷҳизоти он  иваз  карда шуданд.         Оби  сарҳавз  ба  воситаи  хлор  ва моддаҳои  дигари  химиявии  ба организми  инсон  безарар  тоза  карда  мешавад, ки  онҳоро  аз  Қазоқистон  ворид  месозанд. Дар  натиҷа  сифати   оби ошомиданӣ  дар  ноҳияҳои  Шоҳмансур,  Сино ва қисман  дар  хиёбони  Рӯдакӣ  хеле  беҳтар  гардид.         Мутахассисони  корхона  насби  дастгоҳҳои  андозагири  ҳаҷми  обро  дар корхонаҳою  муассисаҳо  ва  хонаҳои  сокинони  пойтахт  давом  медиҳанд. Ин  барои   сарфа  кардани  об  ва  буҷети  давлату  оила   зарур  мебошад. Зеро  захираҳои об   дар  мамлакатамон  чӣ  қадаре  ки  фаровон  набошанд, онро  ғайриоқилона  сарф  кардан  дуруст  нест.      Сокинони  пойтахт дастгоҳҳои  андозагири  ҳаҷми  обро бояд  худашон  аз бозор  харанд. Нишондоди онҳо  охири  ҳар  моҳ  ба  ҳисоб  гирифта, аз рӯи он   пули  об муайян  карда  мешавад. Корхонаи  воҳиди  давлатии  «Душанбеводоканал»  ҳамаи  сокинони  пойтахтро  даъват  мекунад, ки  обро   сарфакоронаю  оқилона  истифода  бурда,  сари  вақт  пули онро   супоранд.