БА ВОҲАИ ҒАЗЗАҲ ФОҶИАИ ГУМАНИТАРӢ ТАҲДИД МЕНАМОЯД

            Ню – Йорк,  6  январ. (АМИТ «Ховар» — РБК).   –  Намояндаи  СММ   дар  Фаластин  Кристофер  Гиннес  ба  хабарнигорон  гуфт, ки   ба  воҳаи  Ғаззаҳ  таъҷилан  маводи  озуқа  фиристодан  зарур  аст, зеро  сокинони   минтақа  ба  гуруснагии   шадид  рӯ  ба  рӯ  гардидаанд.  Қайд карда  шуд, ки  захираи  боқимондаи  маводи  хӯрока  дар  ин  ҷо  танҳо  барои  ду  шабонарӯзи оянда  кифоя  мекунаду  халос.           Намояндаи  СММ  афзуд, ки  айни  ҳол  дар  воҳаи  Ғаззаҳ  бештар  аз  миллион  нафар  сокинони  маҳаллӣ аз қувваи  барқ  маҳрум гардидаанд. Шифохонаҳои   воҳаи  Ғаззаҳ  пур  аз  маҷрӯҳон  мебошанд. Дар  ин  ҷо  бо  сабаби   набудани  қувваи  барқ  аз  генераторҳо  истифода  карда  мешавад.        Намояндагони   Исроил  изҳор  намуданд, ки   дирӯз  ба  воҳаи  Ғаззаҳ  бо 80  мошини  боркаш  дору  ва  озуқа  фиристода  шуд. Аз  рӯи  маълумоти  вазорати  тандурустии  Фаластин  баъди   3  январ,  яъне баъди ба  воҳаи  Ғаззаҳ  ворид  гардидани  қисмҳои  ҳарбии  Исроил  дар  ин  ҷо  90  сокини  маҳаллӣ,  аз  ҷумла,  26  кӯдак  ҳалок  шуд.         Ҷомеаи  ҷаҳон  ва  созмонҳои  байналхалқӣ  кӯшиш  мекунанд, ки   задухӯрдҳои  мусаллаҳона  дар  воҳаи Ғаззаҳ  ҳар чи  зудтар  қатъ  карда  шаванд. Айни  ҳол  намояндаи  махсуси Президенти  Русия  дар  Шарқи  Наздик  Александр  Салтанов,  Президенти  Фаронса  Николя  Саркози,  ҳайати  Иттиҳоди  Аврупо  ва  дигарон  дар  ҳамин  минтақа  қарор  доранд.        Ситоди   артиши  Исроил  хабар  дод, ки  танҳо  5  январ  аз  қаламрави  Фаластин  ба  ноҳияҳои  ҷанубии  мамлакат  20  мушаки  тарканда  парронда  шуд.  Айни  ҳол  ба  қаламрави  воҳаи  Ғаззаҳ қариб  4  ҳазор  аскару  афсари  исроилӣ  дохил  гардидааст. Задухӯрдҳои  мусаллаҳона  бо   силоҳбадастони  «Хамос»  дар  наздикии  шаҳрҳои  Байт — Хонун  ва  Ҷабалия   давом  доранд. Худи  шаҳри  Ғаззаҳ  аз  тарафи  аскарони  исроилӣ  иҳота  карда  шудааст.