БАХШИДА БА 100 СОЛАГИИ НАХУСТИН ГЕНЕРАЛИ ТОҶИК МАСТИБЕК ТОШМУҲАММАДОВ

         Хоруғ, 13 январ. (АМИТ «Ховар», Лутфишо Додо).- Бахшида ба 100 солагии нахустин генерали тоҷик Мастибек Тошмуҳаммадов дар мактаби рақами 1-и деҳаи Поршнев, ки номи ин абармардро дорад, вохӯрии наслҳо баргузор гардид.        Дар набардҳои Ҷанги Бузургм Ватанӣ  ҳазорон нафар аз ҳамватанони мо иштирок карда, барои озодии  Ватан ҷонбозиҳо намуданд. Аммо бештари фарзандони тоҷик ба ҳайси сарбозон аз ватан дифоъ карда буданд. Мастибек Тошмуҳаммадов бо рутбаи майор дар яке аз қисмҳои ҳарбӣ ба сифати муовини фармондеҳ оид ба корҳои сиёсӣ адои вазифа намудааст. Дар чунин якдавраи   тақдирсоз ва ҳассос на ба ҳар шахс чунин боварию эътимод зоҳир мекарданд.        Баъди бозгашт ба Тоҷикистон Мастибек Тошмуҳаммадов ҳастии худро ба тарбияи ҳарбию ватандӯстии насли наврас бахшид ва чун нахустин генерали тоҷик дар миёни ҳамватанон обрӯю эҳтироми зиёде дошт.        Дар вохӯрие, ки дар мактаби деҳаи Қушки ҷомати Поршнев баргузор гардид, раиси ноҳия Шамсиддин Орумбеков, дӯстону пайвандон ва шогирдони Мастибек Тошмуҳаммадов ширкат варзиданд. Онҳо аз ҳаёти рангини ин абармарди зиндаёд сухан гуфтанду наврасону ҷавононро ҳидоят намуданд, ки дар ватандӯстиву ватанпарварӣ, нангу номус ба хотири дифои Ватан дар ҷодаи нахустгенерали тоҷик гом ниҳанд.