БОНКИ МИЛЛӢ ҚУРБИ АСЪОРИ МИЛЛИРО МЕБАРДОРАД?

                Душанбе, 23 январ. (АМИТ «Ховар», Покиза Маҳмадбекова). — Қурби пули миллӣ дар ҳама кишварҳои Осиёи Марказӣ тақрибан тайи моҳҳои охир аз 10 то 30 фоиз паст рафтааст. Дар Қазоқистон, бузургтарин қудрати иқтисодии минтақа, қурби танга дар зарфи чанд моҳи охир 10 фоиз паст рафта, нархи доллар ба 120 танга баробар аст.                Бӯҳрон дар дигар кишварҳо низ ба назар мерасад. Қурби соми Қирғизистон дар чанд моҳи гузашта наздики 20 фоиз коҳиш ёфтааст. Ҳоло арзиши як доллар дар марказҳои мубодилаи асъори ин кишвар зиёда аз 40 сом шудааст.               Сабаби болоравии қурби доллари ИМА дар Тоҷикистон ин таъсири бӯҳрони ҷаҳонии молиявӣ мебошад. Воридоти асъори хориҷӣ аз фурӯши маҳсулоти содиротии мо дар моҳи ноябр — декабри соли 2008 поён рафт. Танҳо бо сабаби ба фурӯш нарафтани пахтаю алюминий 102 миллион доллар нисбати соли гузашта кам ворид гардид.          Қурби сомонӣ дар аввали моҳи январ башиддат поин рафта, қимати як доллари амрикоӣ аз 3 сомониву 70 дирам ҳам гузашт. Бонки миллии Тоҷикистон маҷбур шуд, ба хотири таскин додани бозори асъор 1 миллион доллар пули нақдашро бо қимати поинтар ба фурӯш гузорад.                Раиси Бонки миллӣ мӯътакид бар он аст, ки барои нигоҳ дошани қурби асъори миллӣ чораҳои зарурӣ андешида мешаванд то ки он устувор монад.