«БОНКИ РУШДИ ТОҶИКИСТОН» СОҲАИ КИШОВАРЗИРО БЕШТАР ДАСТГИРӢ МЕКУНАД

                  Душанбе, 31 январ. (АМИТ «Ховар», Бекназари Абӯбакр). — Соли 2008 ҶСП «Бонки рушди Тоҷикистон» ба як қатор муваффақиятҳо дар соҳаи бонкдорӣ ноил гардида, тавонист мавқеи худро дар бозори молиявии Тоҷикистон қавитар гардонад.                  Дар давоми соли 2008 дороиҳои бонк маблағи умумии 98 614 398 сомониро ташкил дод, ки афзоиш нисбат ба соли 2007-ум 210,1 фоизро ташкил медиҳад. Дороиҳои худӣ бошанд, дар охири сол ба 60 482 643 сомонӣ баробар шуда, нисбат ба соли 2007-ум 243,2 фоиз зиёд аст.                  Қарзҳои додашудаи бонк дар ин давра нисбат ба соли 2007-ум 85,7 фоиз зиёд гашта, маблағи 98 506 511 сомониро ташкил дод. Яке аз самтҳои асосии қарздиҳӣ ин маблағгузории рушди соҳаи кишоварзӣ буд. Дар соли 2008 вазни қиёсии қарзҳои хоҷагии қишлоқ 16,4 фоизи ҳаҷми умумии қарзҳои додашуда ё 16 150 930 сомониро ташкил дод.