БУРДУ БОХТҲОИ КОНСЕРВАТОРИЯИ МИЛЛӢ

        Душанбе, 12 январ. (АМИТ «Ховар», Таҳмина Ғоибназарова).- Пагоҳ, 13 январ дар Консерваторияи миллии ҷумҳурӣ ба номи Талабшо Сатторов конфронси матбуотии  ҳисоботӣ баргузор мегардад. Дар он натиҷаҳои фаъолияти яксолаи консерватория ҷамъбаст карда мешаванд. Роҳбарият,  деканҳои факултаҳо ва  муҳосибон ба хабарнигорон дар бораи  ҳамкории байналхалқӣ, фаъолияти дохилии консерватория ва нақшаҳои соли 2009 маълумоти муфассал медиҳанд.        Мухбири АМИТ «Ховар» хабар медиҳад, ки Консерваторияи миллӣ соли гузашта дар соҳаи ҳамкории байнидавлатӣ натиҷаҳои калон ба даст овард. Омӯзгорони консерватория соли гузашта ба Фаронса  сафар карданд. Онҳо инчунин дар озмунҳои байналхалқии мусиқӣ ва рақс дар Олмон ва Русия ширкат варзиданд. Тибқи нақша, соли равон бо консерваторияи Пекин созишномаи ҳамкорӣ имзо карда хоҳад шуд.