БУРДУ БОХТИ КОНСЕРВАТОРИЯИ МИЛЛӢ

         Душанбе, 14 январ. (АМИТ «Ховар», Тахмина Ғоибназарова).- Ректори Консерваторияи миллии ҷумҳурӣ Раҷабмад Амиров дар ҷараёни нишасти матбуотӣ ба хабарнигорон гуфт, ки ояндаи наздик дар ин ҷо саҳифаи махсуси интернетии  консерватория кушода хоҳад шуд. Айни ҳол ороиши саҳифаи интернетӣ давом дорад. Саҳифаи интернетии консерватория охирҳои моҳи феврал кушода мешавад. Соли гузашта дар консерватория барои донишҷӯёну омӯзгорон синфи компютерӣ кушода шуд, ки бо шабакаи ҷаҳонии Интернет пайваст карда шудааст. То охири сол дар консерватория китобхонаи электронӣ ташкил карда мешавад.        Р.Амиров зикр кард, ки консерватория чандин сол боз нақшаи қабули донишҷӯёнро иҷро  карда наметавонад. Вай афзуд, ки ҳар сол ҳамаи мактабҳо ва коллеҷҳои мусиқӣ тақрибан 60 дохилшавандаро қабул мекунад. Вале онҳоро ҳамагӣ 10 нафар хатм мекунаду халос. На ҳамаи онҳо ба консерватория дохил шуда, ҳунари худро сайқал додан мехоҳанд. Масалан, соли гузашта 77 нафар ба консерватория қабул карда шуд, вале онро ҳамагӣ 30 нафар хатм кард. Дохилшавандагон одатан ба шӯъбаҳои  шашмақомхонӣ, фолклор ва эстрада мароқ зоҳир менамоянд. Шумораи онҳое, ки дар шӯъбаи дирижёри дастаҳои  хорсароён таҳсил карданианд, ниҳоят кам аст, гуфт Р. Амиров.