ДАР ЧИН ТЕЪДОДИ ФАЛОКАТҲОИ НАҚЛИЁТ ВА ҚУРБОНИЁНИ ОН КАМ МЕШАВАД

          Пекин,  4  январ. (АМИТ «Ховар» —  Лента. Ру). – Соли  2008 дар  саросари  Ҷумҳурии  Мардумии  Чин  бештар  аз  265  ҳазор   фалокати  нақлиёт  ба  кайд  гирифта  шуд, ки  дар  натиҷаи  он  73  ҳазору  484  нафар   ҳалок  шуд. Илова  бар  ин   дар  натиҷаи   фалокатҳои  нақлиёт  тақрибан  305  ҳазор  нафар  маҷрӯҳ  шудааст.        Мувофиқи  маълумоти  вазорати  амнияти  ҷамъиятӣ, шумораи  онҳое, ки   соли  2008   дар  натиҷаи  фалокатҳои нақлиёт  ҳалок  шудаанд,  нисбат  ба  соли  2007 – ум  19  фоиз,  теъдоди  маҷрӯҳшудагон 20  фоиз ва  миқдори  фалокатҳои  нақлиёт  10  фоиз  кам  шудааст. Зарари  чунин  фалокатҳо  дар  давоми  сол  бештар  аз  148  миллион доллари  ИМА – ро  ташкил  дод, ки  нисбати  ба  соли 2007 – ум  15,8  фоиз  кам  аст. Ба  ақидаи  коршиносон,  сабабҳои  асосии  кам  шудани  теъдоди   фалокатҳои  нақлиёт  дар  Чин   гузаронидани   маъракаҳои  сершумори  ташвиқу  тарғиби  таъмини   амнияти роҳ  мебошанд.