ДАР ТЕҲРОН ФИЛИАЛИ ДОНИШГОҲИ МИЛЛИИ ТОҶИКИСТОН КУШОДА МЕШАВАД

          Душанбе, 14 январ. ( АМИТ «Ховар», Людмила Дубинина).- Муовини аввали вазири маорифи ҷумҳурӣ Фарҳод Раҳимов ба хабарнигорон гуфт, ки  вазири маорифи мамлакат Абдуҷаббор Раҳмонов ояндаи наздик барои боздиди корӣ ба Эрон хоҳад рафт. Дар ҷараёни мулоқоти ӯ бо вазири маорифи ин мамлакат масъалаи кушодани филиали Донишгоҳи миллии Тоҷикистон дар Теҳрон баррасӣ карда мешавад. Қайд карда шуд, ки тибқи паймони дуҷониба имсол 50 донишҷӯи тоҷик ба Эрон фиристода шуд ва онҳо дар мактабҳои олии ин мамлакт таҳсил мекунанд.         Ф.Раҳимов зикр намуд, ки  роҳбарияти вазорат барои ҳалли проблемаи нарасидани кадрҳо тадбирҳои самарабахш меандешад. Ба қавли ӯ соли гузашта дар мактабҳои мамлакат қариб 7 ҳазор муаллим намерасид. Имсол шумораи онҳо қариб ду баробар кам шуд. Ин натиҷаи тадбирҳоест, ки дар вазорат ба манфиати мутахассисони ҷавон андешида мешаванд. Бо вуҷуди ин айни ҳол дар 126 мактаби миёна омӯзгорони   забонҳои хориҷӣ, забону адабиёти тоҷик, математика , физика, химия ва биология намерасанд, гуфт муовини аввали вазир.         Зимни сӯҳбат хабар дода шуд, ки гурӯҳи омӯзгорони мактабҳои олӣ ва  олимони  тоҷик барои иштирок дар анҷумани шашуми  омӯзгорони забону адабиёти  форсу тоҷик ба Эрон рафтанд. Анҷумани мазкур бо ташаббуси  вазорати фарҳанги Эрон гузаронида мешавад. Дар он намояндагони бештар аз 50 мамлакат ширкат меварзанд, гуфт дар хотима Фарҳод Раҳимов.