«ДОНИШҶӮИ СОЛ» ДАР БАЙНИ ДОНИШҶУДУХТАРОНИ ДДОТ

Душанбе, 13 январ. (АМИТ «Ховар» Жасмин Назарова). Дар Донишгоҳи Давлатии Омӯзгории Тоҷикистон ба номи С. Айнӣ озмун баргузор гашт. Тавре ба хабарнигори АМИТ «Ховар» котиби масъули  озмуни мазкур Марҳабо Олимова иттилоъ дод, бо мақсади иҷрои  барномаи давлатии ҶТ оид ба тарбия, интихоб ва ҷобаҷогузории кадрҳои роҳбарикунандаи ҶТ аз ҳисоби духтарони лаёқатманд дар солҳои 2007 – 2016, дар ҳамкорӣ бо Мақомоти иҷроияи ҳокимияти давлатӣ озмуни маърифатӣ — зеҳнии «Донишҷӯи сол» дар байни донишҷӯдухтарони фаъоли донишгоҳ баргузор гардид. Дар ин озмун Раиси кумитаи занон ва оилаи шаҳри Душанбе Сайрамбӣ Лангариева, муовини раиси ноҳияи И. Сомонӣ Зулайхо Зокирова ва донишҷӯдухтарон иштирок намуданд. Шартҳои озмун аз  ҷавоб додан ба саволҳо оид ба баланд бардоштани мақоми зан дар ҷомеа, сатҳи донишандӯзии донишҷудухтарон ва иштироки онҳо дар корҳои ҷамъиятӣ, иборат буд.           Зикр шуд, ки ғолибияти  озмун насиби донишҷӯдухтари курси сеюми факультаи таърих Таманно Бойназарова ва дастаи у гардида, ҷои дуюмро донишҷӯи курси сеюми факультаи забонҳои хориҷӣ Меҳрангез Турсунова ва дастааш  ва ҷои сеюмро донишҷӯи курси дуюми факультаи забон ва адабиёти рус Анзурат Холова ишғол намуданд.