ДУ АГРЕГАТИ НБО ҚАЙРОҚҚУМ АЗ НАВ БАРҚ ТАВЛИД КАРД

            Душанбе, 16 январ. (АМИТ «Ховар», Фарангис Раҳимова). – Корҳои барқарорсозӣ ва дубора ба кор андохтани Нерӯгоҳи барқи обии Қайроққум аз ҷониби мутахассисон идома дорад. Дирӯз, 15 январ, баъд аз таъмир намудан ва анҷом додани  корҳои барқарорсозӣ дар ин нерӯгоҳ 2 агрегат аз нав ба кор даромад. Тавре ба мухмири АМИТ «Ховар» аз маркази матбуоти Мақомоти иҷроияи ҳокимияти давлатии вилояти Суғд хабар доданд, аз имрӯз сар карда  сокинони шаҳру ноҳияҳои вилояти Суғд, ки бар асари садама аз интиқоли барқ  маҳрум шуда буданд марҳила ба марҳила бо барқ таъмин мегарданд. Хотиррасон мекунем, ки 13 январ қабати поёнии иншооти нерӯгоҳи мазкур дар ҳолати садама зери об монда, агрегатҳо аз кор бозистоданд, ки дар натиҷа  аксари сокинони минтақа бе барқ монданд.