ФОҶЕА ДАР ЕКАТЕРИНБУРГ

             Душанбе, 13 январ. (АМИТ «Ховар», Фарангис Раҳимова). – 10 январи  соли ҷорӣ тахминан соати 18:30 дар кўчаи Техническая-и шаҳри Екатеринбург миёни шаҳрвандони Тоҷикистон  Муҳаммадиев Алишер Шарифович, соли таваллудаш 30.07.1971, истиқоматкунандаи маҳаллаи Сомониёни ноҳияи Бохтари вилояти Хатлон Одинаев Абдумалик Абдуалимович, истиқоматкунандаи маҳалаи Қазоқони ноҳияи Синои шаҳри Душанбе муноқиша ба амал омад. Аз Хадамоти муҳоҷирати Вазорати корҳои дохилии Ҷумҳурии Тоҷикистон ба АМИТ «Ховар»  хабар доданд, ки дар натиҷаи муноқиша шаҳрванд Одинаев А. ҳамватани худ Муҳаммадиев Алишерро бо корд зада чор ҷойи қафаси синаашро захмӣ менамояд. Баъд аз бардоштани ҷароҳати вазнин Муҳаммадиев А. ба таври фоҷиавӣ дар беморхона фавтидааст. Бо ин далел Прокуратураи шаҳри Екатеринбург парвандаи ҷиноӣ боз карда, тафтишот мегузаронад. Айни замон, Намояндагии хадамоти муҳоҷирати ВКД ҶТ дар Русия ҳамроҳ бо кормандони Прокуратураи ш. Екатеринбург кўшиш ба харҷ медиҳанд, ки тамоми чораҳоро андешида, тафтишотро ҳаматарафа ва объективона ба анҷом бирасонанд.