ИФТИХОРНОМА ҶИҲАТИ ТАҚВИЯТИ МУНОСИБОТ БО КИШВАРҲОИ ИДМ

             Душанбе, 10 январ. (АМИТ «Ховар», Бекназари Абӯбакр). — Бо қарори Кумитаи иҷроияи Шӯрои сарони Иттиҳоди Давлатҳои Мустақил директори Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон Давлаталӣ Ҳотамов ҷиҳати фаъолияти шоиста дар тақвият ва густариши ҳамкорӣ бо давлатҳои ИДМ бо ифтихорнома сарфарозонида шуд.  Д. Ҳотамов дар сӯҳбат бо мухбири АМИТ «Ховар» ифтихорномаи мазкурро идомаи мантиқии сиёсати пешгирифтаи Ҳукумати ҷумҳурӣ арзёбӣ карда, афзуд, ки ин ҳама аз он шаҳодат медиҳанд, ки бо талошҳои пайвастаи Сарвари давлат Эмомалӣ Раҳмон обрӯю нуфузи Тоҷикистон дар арсаи байналмилалӣ мақоми хосро касб менамояд. Маврид ба зикр аст, ки моҳи октябри соли 2008 Кумитаи иҷроияи Шӯрои сарони ИДМ тасмим гирифт, ки намояндагони беҳтарини мақомоти гуногуни кишварҳои аъзоро ҷиҳати фаъолияти пурсамарашон бо ифтихорнома сарфароз гардонад. Ин ифтихорнома аз Тоҷикистон насиби Давлаталӣ Ҳотамов гардид.