ИШТИРОКИ О. ОҚИЛОВ ДАР МАҶЛИСИ ҲАЙАТИ МУШОВАРА

Душанбе, 9 январ. (АМИТ «Ховар», Покиза Маҳмадбекова). — Имрӯз дар шаҳри Душанбе бо иштироки Сарвазири Ҷумҳурии Тоҷикистон Оқил Оқилов маҷлиси ҳайати мушовара дар Вазорати рушди иқтисод ва савдои ҷумҳурӣ баргузор гардид.  Дар ҷаласаи мазкур Сарвазири ҷумҳурӣ дар бораи натиҷаҳои рушди иқтисоди миллӣ дар соли 2008 ва вазифаҳои навбатӣ дар соли 2009 маърӯза кард. Аз ҷумла зикр кард, ки соли сипаригашта афзоиши маҷмӯи маҳсулоти дохилӣ нисбат ба соли 2007 7,9 фоиз афзуд ва ҳаҷми он ба 17 миллиарду 609,3 миллион сомонӣ расид, ки ба ҳар сари аҳолӣ 697 доллари ИМА рост омада, нисбат ба соли 2007 ба маблағи 183 доллар афзудааст. Дар соли сипаригашта ҳаҷми истеҳсоли маҳсулоти кишоварзӣ 7 миллиарду 807,3 миллион сомониро ташкил дода, ки нисбат ба соли 2007  7,9 фоиз зиёд аст. Дар ҳамаи соҳаҳои иқтисодиёт ба ғайр аз саноат, пешравӣ мушоҳида мегардад. Гардиши савдои хориҷии ҷумҳурӣ бошад, дар соли гузашта ба 4 миллиарду 549,6 миллион доллари амрикоӣ расид, ки ба 113,3 фоизи соли 2007 баробар аст. Ҳаҷми умумии Буҷети давлатӣ дар соли 2008-ум 106 фоиз иҷро гардида, ба он 5 миллиарду 291,3 миллион сомонӣ маблағ ворид гардид, ки нисбат ба соли 2007 1,6 миллиард сомонӣ зиёд аст. Умуман буҷети тасдиқшудаи давлатӣ аз рӯи шаш намуди андоз, даромадҳои ғайриандозӣ ва грантҳо таъмин нагашта, ба он қариб 138 миллион сомонӣ ворид нашуд. Сабаби дигари иҷро нагардидани даромадҳои дохилӣ ин зиёдшавии бақияпулиҳои андоз ва пардохтҳои иҷтимоӣ мебошад. Зиёдшавии бақияпулиҳои андоз дар ҷумҳурӣ дар ҳолати ташвишовар буда, характери доимиро гирифтааст ва ба ҳолати 1 декабри соли 2008 ҳаҷми онҳо ба 506,1 миллион сомонӣ ё ба 28,7 фоизи даромадҳои умумии солонаи андозҳои дохилӣ баробар буда, нисбат ба аввали соли 2008 – ум ба маблағи 119,7 миллион сомонӣ афзудаанд.Ӯ ҳамчунин афзуд, ки ҳаҷми қарзи берунаи Ҷумҳурии Тоҷикистон ба ҳолати якуми январи соли 2009 ба як миллиарду 366,5 миллион доллари амрикои баробар шуд. Ин нишондиҳанда гарчанде нисбат ба авали сол (1 миллиарду 119,9 миллион доллари ИМА) зиёд шуда бошад ҳам, нисбати ММД 1,4 фоиз кам гардида, 28,8 фоизро ташкил дод.