ИСТЕҲСОЛКУНАНДАГОНИ ШИРИ ЗАҲРОЛУД БА ҚАТЛ РАСОНДА ШУДАНД

                    Душанбе, 22 январ. (АМИТ «Ховар», Бекназари Абӯбакр). — Додгоҳи Чин ду нафарро ба қатл маҳкум кард, ки дар истеҳсоли шири заҳролуд даст доштаанд. Инчунин, мудири кулл ва раҳбари фермаи ширро ба ҳабси абадӣ маҳкум намуда, интизор меравад, ҳукми додгоҳ дар бораи 21 нафари дигаре, ки ба тавлид ва фурӯши шири омехта бо модаи кимиёии меламин айбдор шудаанд, эълон гардад.                    Лозим ба зикр аст, ки ин ҳодиса соли гузашта сабаби мусодираи маҳсулоти ширии Чин дар сартосари ҷаҳон гашта, аз истеъмоли ин шир шаш кӯдак ҳалок ва наздик ба 300 ҳазор тан бемор шудаанд.                  Ин ҳодиса дар асоси хулосаи Созмони ҷаҳонии беҳдошт, ки моҳи октябри соли 2008 интишор гардид, маълум шуд, ки ҳангоми баровардани чунин маҳсулот, бархе аз истеҳсолкунандагони чиноӣ аз маводи ба саломатии инсон зараровари «меламин» истифода мекардаанд. Дар натиҷаи истеъмоли чунин маҳсулот дар сартосари ҷаҳон даҳҳо ҳодисаҳои заҳролудшавӣ ва фавти кӯдакон ба қайд гирифта шуд. Бино ба маълумоти СҶБ, меламин ҳамчунин дар таркиби шоколадҳо, аз ҷумла «Нестле», «Кит-кет», «Марс» ва «Сникерс»-и истеҳсоли Чин кашф шудааст.                   Хушбахтона, бино ба иттилои Хадамоти гумруки назди Ҳукумати Ҷӯмҳурии Тоҷикистон дар давоми соли 2008 аз сӯи мақомоти гумруки ҷумҳурӣ ягон далели ворид шудани шири хушк ва маҳсулоти ширӣ аз Ҷумҳурии Мардумии Чин ба Тоҷикистон ба қайд гирифта нашудааст.                    Ёдовар мешавем, ки вобаста ба ин проблема Вазорати тандурустии Тоҷикистон низ ҷиҳати манъ кардани воридоти шири хушк ва маҳсулоти ширӣ аз Чин ба Тоҷикистон фармон содир карда буд.