КАДОМ НАМУДҲОИ АНДОЗ ИҶРО НАШУДАНД?

                 Душанбе, 27 январ. (АМИТ «Ховар», Бекназари Абӯбакр). — Кумитаи андози назди Ҳукумати Ҷумҳурии Тоҷикистон дар соли 2008 иҷрои нақшаи тасдиқкардашударо ба андозаи 111,6 фоиз таъмин намуда, ба ҷойи 1635,8 миллион сомонӣ ба буҷет 1825,9 миллион сомонӣ ворид сохт, ки он аз нишондиҳандаҳои нақшавӣ дар ҳаҷми 190,1 миллион сомонӣ ва нисбат ба воридоти маблағҳо дар соли 2007 ба андозаи 561,1 миллион сомонӣ зиёд мебошад. Дар ин бора ба хабарнигорон раиси кумитаи мазкур Нусратулло Давлатов 27 январ зимни нишасти матбуотӣ маълумот дод.                 Ӯ афзуд, ки нақшаи аниқкардашуда бо назардошти аз тарафи мақомоти иҷроияи маҳаллӣ қабул карда шудани буҷетҳои иловагӣ ба андозаи 105,6 фоиз таъмин гардида, ба ҷойи 1738,2 миллион сомонӣ ба буҷет 1825,9 миллион сомонӣ ворид карда шуд, ки он аз нишондиҳандаҳои нақшавӣ 84,5 миллион сомонӣ зиёд аст.                 «Дар баробари ин, бояд зикр кард, ки дар соли 2008 иҷрои нақшаи 4 намуди андоз, аз ҷумла андоз аз арзиши иловашуда, андози ягона, андоз аз коркарди маҳсулот ва андоз аз фурӯши нахи пахта таъмин нагардид, ки дар натиҷа аз ин ҳисоб ба буҷет 43,8 миллион сомонӣ ворид нашуд», — таъкид намуд Н. Давлатов.