КОРИ ВАЗОРАТ ДАР СОЛИ 2008 НЕК АРЗЁБӢ КАРДА ШУД

                   Душанбе, 23 январ. (АМИТ «Ховар», Лутфия Эшонқулова). — Тибқи «Барномаи рушди фаъолияти китобдорӣ дар Ҷумҳурии Тоҷикистон барои солҳои 2006-2015» барои таҷҳизонидани китобхонаҳо бо технологияи муосири компютерӣ 139848 сомонӣ сарф шуда, ба 16 шаҳру ноҳияҳои мамлакат ирсол карда шуд. Дар ин бора вазири фарҳанги ҶТ Мирзошоҳрух Асрорӣ дар нишасти матбуотӣ, ки 23 январ дар ин вазорат баргузор гардид, маълумот дод. Ӯ зикр намуд, ки ҷиҳати амалисозии «Барномаи компютеркунонии муассисаҳои таълимии фарҳанг ва санъат» як қатор муаасисаҳои таълимии тобеи вазорат бо таҷҳизоти компютерӣ таъмин карда шуданд.                   Дар давраи сипаришуда, бо мақсади густаришу таҳкими робитаҳои байналхалқӣ Созишномаҳои ҳамкории фарҳангӣ байни Ҳукумати Ҷумҳурии Тоҷикистон ва Ҳукумати Ҷумҳурии Алҷазоир ва Украина ба имзо расонида шуд. Лоиҳаи Созишномаи байни Ҳукумати Ҷумҳурии Тоҷикистон ва Созмони мероси фарҳангии Ҷумҳурии Исломии Эрон оид ба тармим ва таъмири ёдгориҳои таърихӣ ва фарҳангии Ҷумҳурии Тоҷикистон мавриди баррасӣ қарор гирифт.                  Бо мақсади баланд бардоштани тахассус ва маҳорати касбӣ факултаи такмили ихтисоси кормандони соҳаи фарҳанг, санъат ва табъу нашр дар назди Донишкадаи давлатии санъат таъсис дода шуд ва то ба имрӯз онро 57 нафар шунаванда аз рӯи самти тахассуси фарҳангӣ бо муваффақият хатм карданд.                 Вазир бо қаноатмандӣ изҳор кард, ки дар соли 2009 вазорати фарҳанг ва аҳли ҳунару санъат бобати бошукӯҳу сазовор таҷлил намудани ҷашнҳои дар пешистода, аз ҷумла Фестивал-озмуни ҷумҳуриявии театрҳои касбии «Парасту», фестивали байналхалқии театрҳои касбии Осиёи Миёна «Наврӯз», иди «Шашмақом», 1310- солагии бузургдошти Имоми Аъзам, Рӯзҳои фарҳангии Тоҷикистон дар Украина, Туркманистон, Арманистон, Рӯзҳои дӯстии Эрону Тоҷикистон ва Рӯзҳои фарҳангии Ҳиндустон ва Арманистон дар Тоҷикистон, Фестивал-симпозиуми сеюми байналмиллаии «Фалак» ва ғайра тамоми имкониятҳои моддиву маънавӣ ва донишу таҷрибаи хешро самаранок равона месозанд.