ЛОИҲАҲОИ БОНКИ ИСЛОМИИ РУШД ТАТБИҚ МЕШАВАД

                 Душанбе, 23 январ. (АМИТ «Ховар»). Вазири рушди иқтисод ва савдо Ғуломҷон Бобозода ҳайати Бонки исломии рушдро таҳти сарварии Фаррух Муан ба ҳузур пазируфт. Дар ҳайати мазкур мутахассисон ва таҳлилгарони лоиҳаҳо, намояндагони Бонки исломии Рушд аз қароргоҳи минтақавии Алмаато иштирок доштанд.                 Тавре ба АМИТ «Ховар» аз дафтари матбуотии Вазорати рушди иқтисод ва савдо ҶТ иттиллоъ доданд, дар мулоқот дар бораи татбиқи лоиҳаҳои муштараки сармоягузорӣ бо ширкати Бонки Исломии Рушд мавриди баррасӣ қарор гирифтанд. Аз ҷумла таъкид гардид, ки арзиши умумии лоиҳаҳои соҳаи энергетика 11,6 млн. доллари ИМА буда, аз он ҳиссаи Бонки Исломии Рушд 9,2 млн. доллари ИМА ва ҳиссаи ШСХК «Барқи Тоҷик» 2,4 млн. доллари амрикоиро ташкил медиҳад.                 Мутобиқи лоиҳаҳо сохтмони 8 адад НОБ-ҳои хурд дар ноҳияҳои Айнӣ, Нуробод, Рашт, Тоҷикобод, Ҷиргатол, Балҷувон, Турсунзода ва Шаҳринав дар назар аст. Мутаасифона суръати корҳо дар иншоотҳои номбаршуда хеле паст аст ва аз оғози татбиқи лоиҳаҳо ҳамагӣ 25% корҳо ба субут расидаанд. Бинобар ҳамин шартномаҳои байни пудратчи ва корфармо-Муассисаи давлатии «Маркази идораи лоиҳаҳои бахши электроинергетика» бекор карда шуда, баъд аз баргузории тендер, амалӣ гардонидани лоиҳа ба зиммаи пудратчиён вогузор карда шуд. Мутобиқи маълумоти муассисаи зикршуда, айни замон ҷараёни гирифтани кафолати бонкӣ аз ҷониби ширкати пудратчии маҳаллӣ идома дорад.                Ҳамчунин дар ҷараёни сӯҳбат масъалаи тезонидани корҳо ҷиҳати татбиқи лоиҳаҳои сохтмон ва таҷҳизонидани беморхонаи бисёрошёнаи байниноҳиявии вилояти Хатлон бо арзиши умумии 17,2 млн. доллари амрикоӣ ба анҷомрасонии сохтмони се мактаби миёна ва дастрас намудани таҷҳизотҳо дар ноҳияҳои Ваҳдат, Турсунзода ва Панҷ ба маблағи 3,3 млн. доллари ИМА махсусан таъкид гардид.