МИСРИ АРАБ БАРОИ ТОҶИКИСТОН ДИПЛОМАТ ВА ТАРҶУМОН ТАЙЁР МЕКУНАД

                 Душанбе, 28-уми январ. (АМИТ«Ховар», Наргис Бояҳмадова). — 27 январ вазири корҳои хориҷии Ҷумҳурии Тоҷикистон Ҳамрохон Зарифӣ бо вазири ҳамкории байналмилалии Ҷумҳурии Мисри Араб хонум Фоиза Абуннаҷо мулоқот кард.                Сардори департаменти иттилооти Вазорати корҳои хориҷии кишвар Давлат Назриев ба мухбири АМИТ «Ховар» гуфт, ки дар рафти ин мулоқот, ки дар фазои дӯстона ва ҳусни тафоҳум ҷараён ёфт, доираи васеи масъалаҳои тавсеаи ҳамкориҳои судманд, аз ҷумла дар соҳаҳои кишоварзӣ, тиб ва энергетика мавриди баррасӣ қарор гирифтанд. Ба масъалаҳои таъсис додани корхонаи муштараки дорусозӣ ва иштироки ҷониби мисрӣ дар лоиҳаҳои гидроэнергетикии Тоҷикистон таваҷҷӯҳи хос зоҳир гардид. Ҷиҳати таҳкими ҳамкориҳои дуҷониба ва робитаҳои пайваста аҳамияти кушодани хатти сайри ҳавопаймо байни ҳарду кишвар таъкид гардид.Вазири корҳои хориҷии Ҷумҳурии Тоҷикистон диққати ҳамсӯҳбаташро ба зарурати ифтитоҳи Сафорати Ҷумҳурии Мисри Араб дар Ҷумҳурии Тоҷикистон ҷалб намуда, истифодаи таҷрибаи сулҳофаринии ҷониби Мисрро дар ҳалли қазияи Афғонистон муҳим арзёбӣ кард.                 Мавриди зикр аст, ки дар ҷараёни ин мулоқот, ҳамзамон масъалаи бозомӯзии мутахассисони тоҷик дар курсҳое, ки аз ҷониби Бунёди мисрӣ оид ба ҳамкориҳои техникӣ бо кишварҳои Итиҳоди Давлатҳои Мустақил ташкил мешаванд, мавриди таваҷҷӯҳи хосса қарор гирифт. Ҷониби мисрӣ омодагиашро дар мусоидат ва тайёр кардани мутахассисон дар курсҳои бозомӯзии дипломатӣ ва тарҷумонӣ изҳор кард.