МУАССИСАҲОИ ТИББИИ БЕҲТАРИНИ СОЛ МУАЙЯН КАРДА ШУД

                  Душанбе, 22 январ. (АМИТ «Ховар», Ибодат Давлатова). — Дар ҷаласаи ҷамъбастии ҳайати мушовараи Вазорати тандурустии Ҷумҳурии Тоҷикистон натиҷаи озмуни муассисаи беҳтарини соли 2008 ҷамъбаст гардид.                 Тавре ба мухбири АМИТ «Ховар» аз маркази матбуоти Вазорати тандурустӣ хабар доданд, Беморхонаи клиникии ёрии таъҷилии тиббӣ дар байни муассисаҳои зертобеи раёсати тандурустии шаҳри Душанбе ғолиб эълон карда шуд.                Инчунин, Маркази илмии ҷарроҳии дилу раг ва қафаси сина, беморхонаи вилоятии шаҳри Хоруғи Вилояти Мухтори Кӯҳистони Бадахшон, Маркази вилоятии бемориҳои дили шаҳри Кӯлоби вилояти Хатлон, Маркази эндокринологии вилоятии шаҳри Хуҷанди вилояти Суғд ва беморхонаи марказии ноҳияи Шаҳринав ҳамчун муассисаҳои беҳтарини сол дониста шуданд.                Ба роҳбарони беморхонаҳо сертификати муассисаи беҳтарини сол ва як адади компютер тақдим карда шуд.