«ОРИЁНБОНК» БОЗ ЯК БАНКОМАТ ДАР БИНОИ ТЕЛЕВИЗИОНИ САФИНА МЕГУЗОРАД

Душанбе, 16 январ. (АМИТ «Ховар», Покиза Маҳмадбекова). — Бо мақсади вусъат додани самтҳои мавҷуда ва азхуд намудани самтҳои нави бизнес, инчунин таъмини имкониятҳои беҳтар барои мизоҷони худ, дорандагони кортҳои бонкӣ, «Ориёнбонк» шабакаи банкоматҳои худро на танҳо дар пойтахт, балки дар ноҳияҳои дурдасти ҷумҳурӣ низ васеъ мегардонад. Аз семоҳаи чоруми соли 2008, банкоматҳои наве, ки дар фурудгоҳи шаҳри Чкаловски вилояти Суғд, филиалҳои бонк дар шаҳрҳои Турсунзода, Роғун ва Норак, инчунин дар майдончаи сохтмонии ГЭС-и Роғун муқаррар карда шуданд, ба кор шурӯъ намуданд. Барои амалӣ гардонидани пардохтҳои ғайринақдии молу хизматҳо дар корхонаҳои савдо ва хизматрасонӣ, бонк инчунин Pos-терминалҳоро устувор менамояд, ки он ба кормандон ва мизоҷони бонк бе иштироки пули нақд пардохт намудани молу хизматҳоро имкон медиҳад.Рӯзҳои наздик устувор намудани боз як банкомат дар бинои телевизиони Сафина, ки бо он шартнома ба имзо расидааст, пешбинӣ шудааст. Ба санаи интиҳоии ҳисоботии соли 2008 шумораи дорандагони кортҳои пластикии ҶСК «Ориёнбонк» ба зиёда аз 14 ҳазор нафар расид, ки ин нисбат ба ҳамин давраи соли 2007 ду маротиба зиёдтар буда, афзудани боварии мизоҷон ба бонк ва хизматрасонии бонкиро тасдиқ менамояд.