ОЗМОИШГОҲҲОИ ТАШХИСИИ «ТОҶИКСТАНДАРТ» ФАЪОЛ МЕШАВАНД

Душанбе, 12 январ. (АМИТ «Ховар», Бекназари Абӯбакр). — Дар тамоми самтҳои фаъолияти Агентии давлатии «Тоҷикстандарт» озмоишгоҳҳо мавқеи муҳим доранд. Зеро, бехатарии молу маҳсулот маҳз тавассути озмоишгоҳҳо ва ташхисҳои амиқи онҳо таъмин карда мешавад. Дар соли 2008 дар Агентии «Тоҷикстандарт» озмоишгоҳи нави зудамали ташхисӣ «ИнфраЛюм» ба кор даромад, ки дар ҷумҳурӣ ягона буда, сифати маҳсулоти гуногуни хӯрокаро дар кӯтоҳтарин муддат ба таври дақиқ аз санҷиш мегузаронад. Инчунин, озмоишгоҳи нави бо дастгоҳи замонавии спектографи атомӣ — адсобсионӣ САА «Квант-2А» ҷиҳозонида шуда, ба фаъолият сар кард, ки ба воситаи ин дастгоҳ қариб тамоми элементҳои системаи давриро муайян кардан мумкин аст. Дастгоҳи САА «Квант — 2А» яке аз асбобҳои дақиқ буда, ба дараҷаи атомӣ миқдори моддаҳои заҳровар, хусусан, металлҳои дар таркиби маҳсулоти хӯрокворӣ бударо муайян мекунад.Лозим ба ёдоварист, ки соли 2008 аз тарафи озмоишгоҳҳои ташхиси маҳсулоти хӯроквории Агентии «Тоҷикстандарт» 35514 намунаи маҳсулот аз ташхис гузаронида шуд, ки аз ин миқдор 3,4 фоизашон ғайристандартӣ дониста шуданд. 453 тонна орд, 876 тонна шакар, 298 ҳазор дона тухм, 211 тонна равғани растанӣ, 199 тонна консерва, 48 тонна чой, кофе, какао, 40 тонна маҳсулоти ширӣ, 18629 дал нӯшокиҳои спиртӣ ва 15960 дал нӯшокиҳои ғайриспиртӣ аз ҷумлаи инҳоянд.