ПЕШНИҲОДИ ТОҶИКИСТОН БА АССАМБЛЕЯИ ГЕНЕРАЛИИ СММ

        Душанбе,  4  январ. (АМИТ «Ховар,  Фарангис  Раҳимова). —  Намояндагони  18  давлати  аъзои  СММ,  аз  ҷумла,  Тоҷикистон  аз  раиси  Ассамблеяи   генералӣ  хоҳиш  карданд, ки   масъалаҳои  марбут  ба  самаранокии  истифодаи  қувваи  барқ,  роҳу  усулҳои   сарфаи  энергия ва   проблемаҳои  манбаъҳои   нави   барқароршавандаи   энергия, қувваи  барқ  ва  гармиро   мавриди  баррасӣ  қарор  диҳад.  Онҳо  пешниҳод  намуданд, ки   ин  масъалаҳо  дар  ҷараёни   иҷлосияи  63 – юми  ассамлея  муҳокима  карда  шаванд.          Дар  номаи  ба  унвони  раиси  Ассамблеяи  Генералӣ  фиристодашуда  зикр  карда  мешавад, ки  ҳалли  масъалаҳои  сарфаи  қувваи  барқ,  гармӣ   ва  манбаъҳои  наву  барқароршавандаи  энергия  дар  бобати   ба  даст  овардани  ҳадафҳои  рушд ва  бартараф  сохтани  проблемаҳои  тағйир ёфтани  иқлим  нақши  асосӣ   мебозанд.       Дар  нома қайд  карда  мешавад, ки  Ассамблеяи  Генералӣ   ҳамчун  маркази  асосии   мусоҳиба   ва  ҳамоҳангсози  СММ  барои   вусъати  огоҳӣ,  иваз  кардани  таҷрибаи  пешқадам  ва  мусоидат   ба   ҳалли  проблемаҳои  мазкур  мақоми  мувофиқ  мебошад.