ПРЕЗИДЕНТИ ИМА САВГАНД ЁД КАРД

                  Душанбе, 21 январ. (АМИТ «Ховар», Людмила Дубинина). — 20 январ дар Вашингтон маросими савгандёдкунии президенти 44 -уми Иёлоти Муттаҳидаи Амрико Барак Обама баргузор гардид.                  Корманди калони илмии Пажӯҳишгоҳи давлат ва ҳуқуқи Академияи илмҳои Тоҷикистон Комёб Ҷалилов зимни сӯҳбат бо мухбири АМИТ «Ховар» зикр намуд, ки баъди ба сари ҳокимият омадани президенти нави ИМА сиёсати стратегии маъмурияти ин мамлакат дар соҳаҳои сиёсию иқтисодӣ ва сиёсати дохилию хориҷӣ мисли пештара боқӣ хоҳад монд. Пешгӯӣ кардан мумкин аст, ки дар давоми солҳои наздик қисмҳои ҳарбии ИМА аз Ироқ бароварда, дар ин мамлакат ҳукумати миллӣ ташкил карда мешавад. Барак Обама мисли президенти собиқи мамлакаташ Ҷорҷ Буш тарафдори зиёд кардани теъдоди аскарону афсарони хориҷӣ ва вусъат бахшидани амалиёти зидди террористӣ дар Афғонистон мебошад.                   Гуфтан мумкин аст, ки ИМА таҳти роҳбарии Барак Обама барои ҳалли масъалаҳои стратегию сиёсӣ, аз ҷумла, тақвияти мубориза ба муқобили терроризми байналхалқӣ бо Русия бештар ҳамкорӣ хоҳад кард. Дар муносибатҳои ИМА ва Тоҷикистон рух додани тағйироти ҷиддӣ гумон аст. Муносибатҳои онҳо мисли пештара давом дода хоҳанд шуд. Ба ақидаи К.Ҷалилов, ИМА ва Тоҷикистон дар масъалаҳои иқтисодӣ ва барқарор сохтани Афғонистон бештар ҳамкорӣ карда метавонанд.