РАЗВЕДКАИ ИМА САРДОРОНИ ҚАБИЛАҲОИ АФҒОНРО БО РИШВА МЕХАРАД

Вашингтон, 6 январ. (АМИТ  «Ховар» — Кабар).- Разведкаи ИМА дар Афғонистон барои ба даст овардани маълумот дар бораи  фаъолияти силоҳбадастон усулҳои гуногунро истифода мебарад. Рӯзномаи  «Вашингтон  пост»  хабар медиҳад, ки разведкачиён барои ба даст овардани маълумоти зарурӣ ба сардорони қабилаҳои маҳаллии Афғонистон на танҳо пулу мол пора медиҳанд, балки онҳоро ба ивази доруҳои барангезандаи ҳиссиёти шаҳвонӣ мехаранд. Дар мақолаи рӯзнома мисол оварда мешавад, ки як корманди  Раёсати марказии разведка ба назди сардори қабилаи  60 — солаи афғон омада, ба ӯ доруҳои кабудчаранги «Виагра» тӯҳфа кардааст. Ӯ баъди чанд рӯз ба роҳбаронаш маълумоти муҳимро пешниҳод намуда, дархост кардааст, ки ба ӯ боз  доруи «Виагра» диҳанд. Разведкачиён барои ба даст овардани ҳадафҳояшон ба мансабдорон ҳатто кордчаҳои  қаламтезкунӣ, асбобу анҷоми гуногун, бозичаҳо, дору ва асбобу анҷоми таҳсили сохти хориҷиро тӯҳфа мекунанд.Рӯзнома менависад, ки разведкаи Амрико барои ба даст овардани маълумот аз усулҳои гуногун, аз ҷумла сохтани мактабҳо дар деҳаҳои дурдаст ва  ба куҳансолон пешниҳод намудани ҳар гуна даво истифода мебаранд. Қайд карда мешавад, ки  дар шароити имрӯза ба сардорони қабилаҳо додани пора  дар шакли пул ё аслиҳа самараи дилхоҳ намедиҳад. Тавре ки маълум аст, сардорони қабилаҳои афғон одатан одамони солхӯрда буда, то 4 нафар зан доранд. Онҳо ба воситаи доруҳои барангезандаи қувваи шаҳвонӣ обрӯю эътиборашонро дар оила  ва  қабила нигоҳ медоранд. Яке аз афсарони собиқи Раёсати марказии разведка Роберт Байэр зикр мекунад, ки Кумитаи амнияти давлатии Иттиҳоди Шӯравӣ дар вақташ барои гирифтани маълумот аз дипломатҳои хориҷӣ бисёр вақт занону духтаронро истифода мебурд.