РОҲҲО МАҲКАМАНД

      Хоруғ,  4  январ. (АМИТ «Ховар»,  Л.Додо). –  Баъди  хушксолии  ду – се  соли  охир   ахиран  дар  ҳудуди   ВМКБ  барф  борид. Боришоти  барф   бегоҳии   рӯзи 2 – юуми   моҳи  январ  оғоз  гардид. Тавре   муовини  сардори  Ситоди  ҳолатҳои  фавқулодда ва  мудофиаи   шаҳрвандони  вилоят Муқбилшоҳ Муқбилшоев ва  танзимгари   иттиҳодияи  истеҳсолии  «Бадахшоннақлиёт»  Қурбонмамад Некқадамов  иттилоъ   доданд,  баъди  боришоти  зиёд   дар  километри 506 ва 13 – и   шоҳроҳи  Душанбе – Хоруғ – и  деҳаи Вознавди   ноҳияи  Рӯшон   бар  асари  аз  кӯҳ  канда  шудани  тарма   рӯзи  3 — юми  моҳи  январ роҳ  маҳкам  шуд. Рӯзи  4 – уми январ  дар  ҳар  ду  мавзеъ   роҳ  кушода  шуд,  аммо  дар  километри  572 — и   деҳаи  Пастбаҷуви  ноҳияи  Рӯшон  тармаи   азиме  роҳро   маҳкам   кард ва  ҳоло   тоза кардани  он  идома  дорад.        Дар  ноҳияи  Ишкошим  бошад  аз  километри  24  то  39  — и  шоҳроҳи   Хоруғ –  Ишкошим  саросари  роҳ  тармапӯш аст. Дар  километри  41, 42  ва  51 – и  ин  роҳ  низ  ҷо – ҷо  тармаҳои  хурду  калон  аз  кӯҳ   канда   шуда,   роҳро  маҳкам  карданд. Дар  шоҳроҳи  Хоруғ — Ӯш  дар  километри  52 – и  деҳаи  Шитами  ноҳияи  Шуғнон  роҳ  маҳкам  аст ва дар  тоза  кардани  он  техникаи  зиёде  кор  мекунад.  Роҳ  танҳо   байни  ноҳияи  Роштқалъа  ва  шаҳри  Хоруғ   кушода  аст.         Тавре   коршиносон  иттилоъ  доданд,  ба  хотири  тоза  кардани  тарма  имрӯз  техникаи  пуриқтидор ва  сӯзишвории зарурӣ мавҷуд  аст. Сабаби қадри  дер  тоза  кардани   тармаҳо ин  камбудии   техникаю  сӯзишворӣ не ,  балки  чизи  дигарест. Гап   дар  сари он  аст, ки   дар  ҷое  чун   аз  кӯҳ  тарма  канда шуда  роҳро   маҳкам   мекунад, ин  як  қисмати  барф  аст,  дар  роҳи  тармафуроӣ   ҳанӯз  барфи  зиёд  мехобад ва  эҳтимоли  такроран  фуромадани   тарма  ҳамеша  ҷой  дорад. Тармаи   такрорӣ   бошад   нисбати ба  тармаи  аввалия   азимтар   буда,  ҳамеша  фалокатҳои  бешеро  ба  бор  меорад. Нафароне,  ки тармаи аввалияро  тоза   мекунанд,  аксарият  вақт  зери тармаи  такрорӣ  мемонанду  ҳалок  мешаванд. Аз ин  лиҳоз,  тармаи   аввалия  хеле  эҳтиёткорона  тоза  карда  мешавад. Баландии  барф дар  вилоят  аллакай  ба  55  см  расидааст.