РОҲБАРИ МАРКАЗИ ИДОРАИ БАРНОМАҲОИ БЕҲТАР СОХТАНИ ФАЪОЛИЯТИ ГУМРУК АЗ КОР ОЗОД ШУД

           Душанбе, 16 январ. ( АМИТ «Ховар», Темур Бандишоев).-Ҳукумати Тоҷикистон барои то ҳадди имкон кам кардани таъсири бӯҳрони ҷаҳонии молиявӣ ба иқтисодиёти мамлакат тадбирҳои зарурӣ меандешад. Дар ин бора  Президенти ҷумҳурӣ Эмомалӣ Раҳмон дар маҷлиси  васеи  Ҳукумати мамлакат сухан ронд. Сарвари  давлат изҳори ташвиш намуд, ки соли гузашта истеҳсоли маҳсулоти саноат хеле кам шуд.          Президент ба  шахсони масъул супориш дод, ки таъмини истифодаи мақсадноку самарабахши маблағҳои буҷетро таҳти назорати қатъӣ гиранд. Илова бар ин директори Агентии  стандартизатсия, метрология, сертификатсия ва назорати  савдо  Давлаталӣ Ҳотамов вазифадор шуд, ки бо мақсади пешгирии  воридот, истеҳсол ва фурӯши маҳсулоти пастсифат дар дохили мамлакат ҳамаи тадбирҳоро андешад. Вазифа ба миён гузошта шуд, ки  соли равон дар мамлакат камаш 50 нерӯгоҳи хурди барқӣ сохта шавад.         Мухбири АМИТ «Ховар»  хабар медиҳад, ки дар маҷлис роҳбари Маркази идораи барномаҳои сармоягузорӣ барои беҳтар сохтани фаъолияти гумрук Анваршо Музаффаров аз кор озод карда шуд.