РОҲБАРОНИ МАҚОМОТИ ДАВЛАТӢ БА ЖУРНАЛИСТОН ҶАВОБ МЕДИҲАНД

Душанбе, 5 январ. (АМИТ «Ховар», Бекназари Абӯбакр). — Тибқи нақшаи тартибнамудаи Дастгоҳи иҷроияи Сарвари давлат аз 12 январ дар вазорату идораҳо, ташкилоту муассисаҳо, мактабҳои олӣ, ВМКБ, вилоятҳо, шаҳри Душанбе ва шаҳру ноҳияҳои ҷумҳурӣ нишастҳои матбуотӣ оғоз гардида, мувофиқи нақша дар ҳар вазорату идора то 28 январ идома меёбанд. Маврид ба зикр аст, ки нишастҳои матбуотӣ дар мақомоти давлатӣ мутобиқи Амри Президенти кишвар Эмомалӣ Раҳмон аз 4 марти соли 2005 баргузор гашта, ҳадафи аслии он инъикоси шаффофияти фаъолияти вазорату идораҳои давлатӣ тариқи ВАО ба мардум буда, роҳбарони мақомоти давлатӣ вазифадоранд, ки ҳар семоҳа роҷеъ ба бурду бохти фаъолияташон маълумот диҳанд.  Таҷриба нишон медиҳад, ки пас аз амалӣ гардидани ин Амри Сарвари давлат дастрасӣ ба иттилооти зарурӣ дар вазорату идораҳои давлатӣ ба таври бояду шояд ба чашм мерасад.