ШАБИ ЭҶОДИИ ГУЛНАЗАР КЕЛДӢ

               Душанбе, 23 январ. (АМИТ «Ховар», Бекназари Абӯбакр). — Бо ибтикори Кумитаи телевизион ва радиои назди Ҳукумати Ҷумҳурии Тоҷикистон 24 январ дар «Кохи Ҷомӣ» шаби эҷодии Шоири халқии Тоҷикистон, дорандаи мукофоти давлатии ба номи Абӯабдуллоҳи Рӯдакӣ, муаллифи Суруди миллии Тоҷикистон Гулназар Келдӣ доир мегардад.               Дар ин базми шеъру суруд дар баробари қироати порчаҳои шеърӣ аз ҷониби худи шоир ва ҳамкасбон, инчунин устодони санъати Тоҷикистон, аз қабили Афзалшо Шодиев, Хосият Ортиқова, Қобилҷон Зарифов, Сайидқул Билолов ва дигарон аз эҷодиёти ин шоири хушсалиқа сурудҳо месароянд.              Мавриди ёдоварист, ки шоир Гулназар Келдӣ 20 сентябри соли 1945 дар деҳаи Дар-дари ноҳияи Айнӣ таваллуд шуда, дастпарвари Донишгоҳи давлатии Тоҷикистон мебошад. Китобҳояш бо номҳои «Расми сарбозӣ», «Дастархон», «Нардбон», «Ағба», «Паҳно», «Лангар», «Чашми нигин», «Пайи дарё», «Табхола» ва ғайраҳо чоп шудаанд, ки дар назми муосири тоҷик мақоми хос доранд.