СОЛИ 2009 РАЁСАТИ МАҚОМОТИ АСОСИИ ИДМ БА ЗИММАИ МОЛДАВИЯ ГУЗОШТА МЕШАВАД

             Душанбе,  7  январ. (АМИТ «Ховар»,  Фарангис  Раҳимова). – Соли  2009  дар  фаъолияти  Иттиҳоди  Давлатҳои  Мустақил  бо тартиботи  нави  ташкилӣ  шурӯъ  шуд.  Бори  аввал  дар  таърихи  ИДМ  раёсати  Шӯрои  сарони  давлатҳо,  Шӯрои  сарони  ҳукуматҳо,  Шӯрои  вазирони  корҳои  хориҷӣ,  Шӯрои  иқтисодӣ, Шӯрои   намояндагони  доимӣ  ва   комиссияи  масъалаҳои  иқтисодӣ   дар  давоми  сол   ба  зиммаи  як  давлат – Ҷумҳурии  Молдавия  гузошта  мешавад. Аз  дафтари  матбуоти  Кумитаи  иҷроияи  ИДМ  ба  АМИТ «Ховар»  хабар  доданд, ки   тартиботи  нав дар  Низомномаи  масъалаҳои  раёсат  дар Иттиҳоди  Давлатҳои  Мустақил  пешбинӣ  карда  шудааст. Низомномаи  мазкур  10  октябри соли  2008   зимни  мулоқоти  сарони  давлатҳои  ИДМ  дар  Бишкек  қабул  шуда буд. Ин  ҳуҷҷат  ба  вусъати  фаъолият  ва  ташаккули   идораи  ИДМ,   бештар  сохтани  самараи  фаъолияти он ва таъмини  идомаи  анъанаҳои   нек  мусоидат  менамояд. Мувофиқи  низомнома,  раиси  мақомоти  асосии Иттиҳод  фаъолияти  онҳоро   ба  роҳ  монда,  масъалаҳои  муҳимтаринро  ба  муҳокимаи  маҷлисҳои  Шӯрои  сарони  давлатҳо пешниҳод  карда,  фаъолияти   мақомоти  асосиро   ҳамоҳанг  месозад. Дар  мавриди   зарурат   бо  давлатҳои  аъзо  масъалаҳои   муҳимтарини  фаъолияти  Иттиҳод   муҳокима  карда  мешаванд. Ҷумҳурии  Молдавия  ба  раёсати  мақомоти  асосии  ИДМ   ҳамаҷониба  тайёрӣ  мебинад.  Дар  ин  ҷо  таҳти  раёсати  президент  Владимир  Воронин  комиссияи  миллӣ  ташкил  карда,   барномаи  махсуси  раёсат  дар  мақомоти  асосии  ИДМ  таҳия  карда  шуд. Соли  2009  дар  ИДМ  силсилаи  масъалаҳои  муҳимтарин  ҳал  карда  мешаванд. Дар  соҳаи  иқтисодиёт  масъалаи  муҳимтарин   масъалаи   ҳамкорӣ  дар   соҳаи  энергетика  мебошад. Инчунин  ба таҳияи  лоиҳаи   нақшаи  амалӣ  сохтани  даври  аввали   барномаи  стратегии  рушди  иқтисодии  ИДМ  то соли  2020  диққати  махсус  дода хоҳад  шуд.  Ғайр  аз ин   дар  масъалаҳои  ҳамкорӣ дар  соҳаҳои  гуманитарӣ,  таъмини  амният   ва  такмили  роҳу  усулҳои  беҳтар  сохтани  фаъолияти  Иттиҳод  ҳуҷҷатҳо  баррасӣ  карда  мешаванд.